12 naýryzdan bastap qaýipsizdik beldigin taqpaǵany jáne kólik júrgizý kezinde telefon qoldanǵany úshin 5 AEK kóleminde aiyppul salynady. Bul - shamamen 21 625 teńge. Talap barlyq adamǵa birdei qoldanylady: júrgizýshilerge de, jolaýshylarǵa da, qoǵamdyq kólikke de, dep habarlaidy Dalanews.kz.
Zańnyń ózi ózgermegen, tek quqyqbuzýshylyqty tirkeý tásili jańardy. Endi jol kameralary buryn politsiia qyzmetkerleri qolmen tirkeitin jaitty avtomatty túrde anyqtaidy.
"Zań boiynsha telefon qoldaný júrgizýshiniń nazaryn bólý retinde qarastyrylady. Telefon qolyńyzda bolsa, magnitke bekitilip tursa nemese qulaqqa jaqyn ustasańyz - munyń bári telefon qoldaný dep esepteledi", - dedi Almaty qalalyq PD profilaktikalyq jumysty úilestirý basqarmasynyń ókili Aidyn Merkimbaev.
Jańa ózgeris qoǵamda qyzý talqylanyp jatyr. Zańger Moldahan Ádilethan da osy jaǵdaiǵa qatysty áleýmettik jelide ún qatty.
"Bul zań buzý bolmaýy kerek. Bul - meniń jeke múlkim. Bir qolymda telefon ustap, kólikti osylai basqarǵym keledi. Sóilespeimin, saǵat qaraýym múmkin. 2-3 sekýndqa kartany bir qarap jiberýim múmkin. Ol degen zań buzý bolmaýy kerek. Qarapaiym halyqqa aiyppuldar kelip jatyr. Telefondy qulaǵyńa taqap alsań nemese TikTok kórip kele jatatyn bolsań, ol kezde zań buzý dese, maqul. Qolyńda ustadyń nemese magnitke jabystyryp qoidyń, ol zań buzý bolmaýy kerek. ...Adamnyń qolyndaǵy telefonǵa emes, jolǵa qarańdar. Jol qandai shurq-tesik ekenine qarańdar. Birinshi joldy jóndeńder, odan keiin baryp telefon, basqa dep tiisesińder. Beldikke sóz joq, kólik basqarǵanda taǵýyń kerek", - dedi ol.
