12 ناۋرىزدان باستاپ قاۋىپسىزدىك بەلدىگىن تاقپاعانى جانە كولىك جۇرگىزۋ كەزىندە تەلەفون قولدانعانى ءۇشىن 5 اەك كولەمىندە ايىپپۇل سالىنادى. بۇل - شامامەن 21 625 تەڭگە. تالاپ بارلىق ادامعا بىردەي قولدانىلادى: جۇرگىزۋشىلەرگە دە، جولاۋشىلارعا دا، قوعامدىق كولىككە دە، دەپ حابارلايدى Dalanews.kz.

زاڭنىڭ ءوزى وزگەرمەگەن، تەك قۇقىقبۇزۋشىلىقتى تىركەۋ ءتاسىلى جاڭاردى. ەندى جول كامەرالارى بۇرىن پوليسيا قىزمەتكەرلەرى قولمەن تىركەيتىن جايتتى اۆتوماتتى تۇردە انىقتايدى.

"زاڭ بويىنشا تەلەفون قولدانۋ جۇرگىزۋشىنىڭ نازارىن ءبولۋ رەتىندە قاراستىرىلادى. تەلەفون قولىڭىزدا بولسا، ماگنيتكە بەكىتىلىپ تۇرسا نەمەسە قۇلاققا جاقىن ۇستاساڭىز - مۇنىڭ ءبارى تەلەفون قولدانۋ دەپ ەسەپتەلەدى"، - دەدى الماتى قالالىق پد پروفيلاكتيكالىق جۇمىستى ۇيلەستىرۋ باسقارماسىنىڭ وكىلى ايدىن مەركىمبايەۆ.

جاڭا وزگەرىس قوعامدا قىزۋ تالقىلانىپ جاتىر. زاڭگەر مولداحان ادىلەتحان دا وسى جاعدايعا قاتىستى الەۋمەتتىك جەلىدە ءۇن قاتتى.

"بۇل زاڭ بۇزۋ بولماۋى كەرەك. بۇل - مەنىڭ جەكە مۇلكىم. ءبىر قولىمدا تەلەفون ۇستاپ، كولىكتى وسىلاي باسقارعىم كەلەدى. سويلەسپەيمىن، ساعات قاراۋىم مۇمكىن. 2-3 سەكۋندقا كارتانى ءبىر قاراپ جىبەرۋىم مۇمكىن. ول دەگەن زاڭ بۇزۋ بولماۋى كەرەك. قاراپايىم حالىققا ايىپپۇلدار كەلىپ جاتىر. تەلەفوندى قۇلاعىڭا تاقاپ الساڭ نەمەسە TikTok كورىپ كەلە جاتاتىن بولساڭ، ول كەزدە زاڭ بۇزۋ دەسە، ماقۇل. قولىڭدا ۇستادىڭ نەمەسە ماگنيتكە جابىستىرىپ قويدىڭ، ول زاڭ بۇزۋ بولماۋى كەرەك. ...ادامنىڭ قولىنداعى تەلەفونعا ەمەس، جولعا قاراڭدار. جول قانداي شۇرق-تەسىك ەكەنىنە قاراڭدار. ءبىرىنشى جولدى جوندەڭدەر، ودان كەيىن بارىپ تەلەفون، باسقا دەپ تيىسەسىڭدەر. بەلدىككە ءسوز جوق، كولىك باسقارعاندا تاعۋىڭ كەرەك"، - دەدى ول.