Qazaq dese dombyra, dombyra dese qazaq, al kúı dese qazaq ta, dombyra da eske túsedi. Shynymen-aq qazaq pen kúı degen sóz – bir uǵym. Óıtkeni, kúı qazaqtyń ishki jan-dúnıesiniń, arman-maqsatynyń, bolmysynyń syry. Úni. Daýysy. Kúı – myńdaǵan ult, ulystardyń ishinde tek qazaqqa ǵana tán óner, qasıet.
Sol qasıetti dáripteý maqsatynda, dombyra kúnine oraı Taldyqorǵan qalasynda «Dombyra – dala daýsy» atty kúıjarysy ótti.
Atalmysh sharaǵa Qaratal, Aqsý, Kóksý, Eskeldi aýdandary men Taldyqorǵan, Tekeli, Qapshaǵaı qalasynyń 70-ke jýyq ónerpazy qatysyp, bir táýlik boıy qazaq úıde kúı shertip, terme oryndap, tań atyrdy.
Ánshi-kúıshiler bir táýlik boıy 500-den astam týyndy oryndaǵan.
Egemendik jolyndaǵy halqymyzdyń rýhyn asqaqtatyp, ulttyq salt-dástúrimizdi nasıhattaıtyn osyndaı taǵylymy mol mádenı shara Jetisý tórinde ekinshi ret uıymdastyrylyp otyr.
Alaıda, ol mezette táýlik boıy kúı oryndaýǵa kúsh jetkiliksiz bolypty. Osy joly shara oń nátıjesin berip, Jetisýlyqtardyń rekordyn Qazaqstan rekordtar kitabynyń ókilderi belgilep, arnaıy sertıfıkattaryn shara uıymdastyrýshylaryna tabystady.
«Túrkıada Aııa-Sofıada jyl boıy toqtaýsyz quran súreleri oqylady. Sonyń aıasynda búkil dúnıe júzi qurandy estigende birden kóz aldylaryna Taıaý Shyǵysty elestetedi. Endigi bizdiń maqsatymyz – dombyranyń únin estigende álem halqy keń dalamyzdy, Qazaqstandy elestetýi kerek, – dedi Almaty oblysynyń İshki saıasat basqarmasynyń basshysy Rýstam Álıuly.
Shara sońynda óner ıeleri alǵys hattarmen marapattaldy.
Baljan QAIRATQYZY
https://www.facebook.com/rustamaliuly/videos/2000241766746526/
