قازاق دەسە دومبىرا، دومبىرا دەسە قازاق، ال كۇي دەسە قازاق تا، دومبىرا دا ەسكە تۇسەدى. شىنىمەن-اق قازاق پەن كۇي دەگەن ءسوز – ءبىر ۇعىم. ويتكەنى، كۇي قازاقتىڭ ىشكى جان-دۇنيەسىنىڭ، ارمان-ماقساتىنىڭ، بولمىسىنىڭ سىرى. ءۇنى. داۋىسى. كۇي – مىڭداعان ۇلت، ۇلىستاردىڭ ىشىندە تەك قازاققا عانا ءتان ونەر، قاسيەت.
سول قاسيەتتى دارىپتەۋ ماقساتىندا، دومبىرا كۇنىنە وراي تالدىقورعان قالاسىندا «دومبىرا – دالا داۋسى» اتتى كۇيجارىسى ءوتتى.
اتالمىش شاراعا قاراتال، اقسۋ، كوكسۋ، ەسكەلدى اۋداندارى مەن تالدىقورعان، تەكەلى، قاپشاعاي قالاسىنىڭ 70-كە جۋىق ونەرپازى قاتىسىپ، ءبىر تاۋلىك بويى قازاق ۇيدە كۇي شەرتىپ، تەرمە ورىنداپ، تاڭ اتىردى.
انشى-كۇيشىلەر ءبىر تاۋلىك بويى 500-دەن استام تۋىندى ورىنداعان.
ەگەمەندىك جولىنداعى حالقىمىزدىڭ رۋحىن اسقاقتاتىپ، ۇلتتىق ءسالت-داستۇرىمىزدى ناسيحاتتايتىن وسىنداي تاعىلىمى مول مادەني شارا جەتىسۋ تورىندە ەكىنشى رەت ۇيىمداستىرىلىپ وتىر.
الايدا، ول مەزەتتە تاۋلىك بويى كۇي ورىنداۋعا كۇش جەتكىلىكسىز بولىپتى. وسى جولى شارا وڭ ناتيجەسىن بەرىپ، جەتىسۋلىقتاردىڭ رەكوردىن قازاقستان رەكوردتار كىتابىنىڭ وكىلدەرى بەلگىلەپ، ارنايى سەرتيفيكاتتارىن شارا ۇيىمداستىرۋشىلارىنا تابىستادى.
«تۇركيادا اييا-سوفيادا جىل بويى توقتاۋسىز قۇران سۇرەلەرى وقىلادى. سونىڭ اياسىندا بۇكىل دۇنيە ءجۇزى قۇراندى ەستىگەندە بىردەن كوز الدىلارىنا تاياۋ شىعىستى ەلەستەتەدى. ەندىگى ءبىزدىڭ ماقساتىمىز – دومبىرانىڭ ءۇنىن ەستىگەندە الەم حالقى كەڭ دالامىزدى، قازاقستاندى ەلەستەتۋى كەرەك، – دەدى الماتى وبلىسىنىڭ ىشكى ساياسات باسقارماسىنىڭ باسشىسى رۋستام ءالي ۇلى.
شارا سوڭىندا ونەر يەلەرى العىس حاتتارمەن ماراپاتتالدى.
بالجان قايرات قىزى
https://www.facebook.com/rustamaliuly/videos/2000241766746526/
