Sábidiń ata-anasyn quttyqtaǵan oblys basshysy Beibit Isabaev:
– Aisultan balamyzdyń baýy berik bolsyn. Aisultan tek sizderdiń ǵana emes, elimizdiń mártebesin ósiretin azamat bolsyn. Jańaryp jatqan Qazaqstannyń, elimizdiń jaqsylyǵy men qýanyshynyń kýágeri bolyp, aman-esen er jetsin. Sábidiń ózine de, ata-anasy, sizderge de densaýlyq tileimin. Prezidenttiń arnaiy quttyqtap joldaǵan syilyǵyn tapsyrýǵa ruqsat etińizder, – dep otbasyna balanyń erekshe úlgidegi týý týraly kýáligin, Prezident joldaǵan syi-siiapat – balaǵa qajetti buiymdar, sol siiaqty arba syiǵa tartty.
Sonymen qatar «Otbasy bank» AQ Jetisý oblysy filialynyń direktory Jasulan Qurmanǵaliev Ázimbaevtarǵa 2 mln teńgeniń sertifikatyn usyndy. J. Qurmanǵalievtiń aitýynsha, bul soma balanyń bolashaqtaǵy igiligi úshin banktiń depozitine salynyp, ony keiin Aisultannyń oqýyna nemese baspana alýǵa paidalana alady.
Atap ótsek, Aisultan Sábdenbai 14 qarashada tańǵy 8-der shamasynda dúniege keldi. Anasy Diana Ázimbaeva, ákesi Muhtar Ázimbaev. Buǵan deiin 1 qyz, 2 ul ósirgen erli-zaiyptylar endi kóp balaly otbasy bolyp otyr. Osy qýanyshty kúnde jýrnalistermen tildesken M. Ázimbaev:
– Men Taldyqorǵan qalasyndaǵy № 21751 áskeri bóliminde jaqyn aimaqtaǵy ushý basshysy bolyp qyzmet etemin. Ózim Shymkent óńirinenmin, osy áskeri jumysyma bailanysty Jetisý jerine turaqtadym. Taldyqorǵan áskeri bóliminde qyzmet etip kele jatqanyma on jyldan asty. Osy óńirde shańyraq kóterdim, balalarym osynda ómirge keldi. Búgin, mine, kóp balaly bolyp jatyrmyn. Sondyqtan Jetisý jeri maǵan árdaiym ystyq, – dedi.
Eske salsaq, halyqtyń derekter bazasynyń kórsetkishterine sáikes, 2023 jylǵy 14 qarashada tańǵy saǵat 8.10-da týǵan 5 bala elimizdiń 20 millionynshy turǵyny atandy. Qazaqstannyń mereili azamattary - 3 ul jáne 2 qyz Ulytaý, Jetisý, Atyraý, Aqmola jáne Túrkistan oblystarynda dúnie esigin ashty.
Jalpy Jetisý oblysynda ótken 10 aida 10 527 bala ómirge keldi.
