Abaı oblysynyń ákimi Berik Ýálı Aıagóz aýdanyna jumys saparymen baryp, birneshe áleýmettik mańyzy bar nysanda boldy. Ol kóktemgi sý tasqynyna daıyndyq barysyn baqylap, jylý qazandyǵynyń jumysymen tanysty,- dep habarlaıdy Dalanews.kz
Byltyr kóktemde Aıagóz ózeni erneýinen asyp, birneshe aýlany sý basqan bolatyn. Ótken jyly qaýiptiń aldyn alý úshin ózen jaǵalaýyn bekitý jumysy júrgizildi. Oblys ákimi aýdandaǵy jumys saparyn ózendegi sý deńgeıin qadaǵalaýdan bastap, jergilikti atqarýshy bılikke únemi baqylaýda ustaýdy tapsyrdy.
«Sý basý qaýpi bar oblystardyń qatarynda turmyz. Sondyqtan tasqynǵa daıyndyq jumysyn kúsheıtý qajet. Aıagóz ózeniniń arnasyn keńeıtý máselesin oılastyryńyzdar. Tıisti usynys berińizder»,- dedi oblys ákimi.
Tótenshe jaǵdaılar departamentiniń habarlaýynsha, óńirdegi qyryq bes eldi mekendi sý basý qaýpi bar. Bul aımaqtarda tórt myńǵa jýyq halyq turady. Qazirgi tańda ásirese Aıagóz, Besqaraǵaı, Borodýlıha, Kókpekti aýdandaryndaǵy 20 aýylda qaýip saqtalýda.
