اباي وبلىسىنىڭ اكىمى بەرىك ءۋالي اياگوز اۋدانىنا جۇمىس ساپارىمەن بارىپ، بىرنەشە الەۋمەتتىك ماڭىزى بار نىساندا بولدى. ول كوكتەمگى سۋ تاسقىنىنا دايىندىق بارىسىن باقىلاپ، جىلۋ قازاندىعىنىڭ جۇمىسىمەن تانىستى،- دەپ حابارلايدى Dalanews.kz
بىلتىر كوكتەمدە اياگوز وزەنى ەرنەۋىنەن اسىپ، بىرنەشە اۋلانى سۋ باسقان بولاتىن. وتكەن جىلى ءقاۋىپتىڭ الدىن الۋ ءۇشىن وزەن جاعالاۋىن بەكىتۋ جۇمىسى جۇرگىزىلدى. وبلىس اكىمى اۋدانداعى جۇمىس ساپارىن وزەندەگى سۋ دەڭگەيىن قاداعالاۋدان باستاپ، جەرگىلىكتى اتقارۋشى بيلىككە ۇنەمى باقىلاۋدا ۇستاۋدى تاپسىردى.
«سۋ باسۋ ءقاۋپى بار وبلىستاردىڭ قاتارىندا تۇرمىز. سوندىقتان تاسقىنعا دايىندىق جۇمىسىن كۇشەيتۋ قاجەت. اياگوز وزەنىنىڭ ارناسىن كەڭەيتۋ ماسەلەسىن ويلاستىرىڭىزدار. ءتيىستى ۇسىنىس بەرىڭىزدەر»،- دەدى وبلىس اكىمى.
توتەنشە جاعدايلار دەپارتامەنتىنىڭ حابارلاۋىنشا، وڭىردەگى قىرىق بەس ەلدى مەكەندى سۋ باسۋ ءقاۋپى بار. بۇل ايماقتاردا ءتورت مىڭعا جۋىق حالىق تۇرادى. قازىرگى تاڭدا اسىرەسە اياگوز، بەسقاراعاي، بورودۋليحا، كوكپەكتى اۋداندارىنداعى 20 اۋىلدا ءقاۋىپ ساقتالۋدا.
