Atyraý oblysy men Atyraý qalasynyń eks-ákimi, kásipker Bergei Rysqaliev kúni keshe kópshiliktiń kózine túsip, eldi dúrliktirgen edi. Kózden tasa bolǵan sheneýniktiń sýreti men onyń qazirgi jai-kúii týraly aqparatty qoǵam belsendisi Turarbek Qusaiynov jelige júktegen bolatyn. Qoǵamnyń nazaryn aýdarǵan jazba eks-sheneýniktiń ótkenin qaita qazbalaýǵa túrtki boldy. Osy tusta Dalanews.kz agenttigi Rysqalievtiń saiasi-qoǵamdyq alańda júrip ótken joly men “Eski Qazaqstan” tóńiregindegi sheneýnikke qatysty daýly máselelerdi taǵy bir márte eske túsirip kórdi.
Qusaiynovtyń Rysqaliev týraly jazbasy
Batys óńirin basqarǵan Rysqaliev saiasi sebeptermen Ulybritaniiada bosqyn mártebesin alǵan bolatyn. Sebebi eldiń Joǵarǵy soty qylmystyq qýdalaýdyń saiasi astary bar dep sheshken.
Rysqaliev pen Mýsinniń Londonda júrgen sýreti qoǵam belsendisi Turarbek Qusaiynovtyń paraqshasynda paida boldy.
"Shyndyǵynda Atyraý jurtyna keń tanymal Bergei aǵamyzdyń ainalasyndaǵy jigitter Evropadaǵy qazaq diasporasynyń ishindegi eń myqty top desek bolady. Bul aǵalarymyzdy sýdan taza, sútten aq demeimin,sebebi Qazaqstan sekildi sýper prezidenttik júiede jemqorlyqtan eshkim ada bola almaidy.Biraq qalai aitsaq ta, ár qazaq- meniń jalǵyzym demekshi, elden jyraq júrgen kez kelgen evropashyl qazaq biz úshin qymbat bolýy tiis...", - deidi qoǵam belsendisi.
Ákimdikke deiingi qyzmeti
Atyraý oblysyn jáne Atyraý qalasyn basqarǵan Rysqaliev saiasi sebeptermen Ulybritaniiada bosqyn mártebesin alǵan bolatyn. Sebebi eldiń Joǵarǵy soty qylmystyq qýdalaýdyń saiasi astary bar dep sheshken.
2012 jyly 15 tamyzda eks prezident Nursultan Nazarbaev sol kezdegi ákim Bergei Rysqalievti Atyraý oblysy basshylyǵynan alyp, ornyna Baqtyqoja Izmuhambetti sailaýǵa barǵan. Nazarbaev oblysty alty jylǵa jýyq basqarǵan Rysqaliev basqa qyzmetke aýysatynyn aitqan bolatyn.
Al kelesi kún, iaǵni 16 tamyzda BAQ-tar Bergei Rysqaliev densaýlyq jaǵdaiyna bailanysty otstavkaǵa ketkenin habarlai bastady.
Otstavkadan keiin Rysqalievti diskreditatsiialaý kampaniiasy bastalyp, onyń qolastynda bolǵandardy ustap, qysym kórsetý bastalǵan.
2013 jyldyń 5 aqpanynda Rysqalievke izdeý salyndy. Oǵan Qylmystyq kodekstiń 176-babynda kózdelgen qylmysty jasady degen jáne uiymdasqan qylmystyq qoǵamdastyq qurdy degen aiyp taǵyldy. 2019 jyldyń 25 qańtarynda syrttai sot otyrysy ótip, sot Bergei Rysqalievti 17 jylǵa bas bostandyǵynan aiyrdy. AQSh saiasatkerleri Rysqalievti syrttai sottaýdyń saiasi astary bar dep baǵa berdi.
Osy aptada Joǵarǵy sot jemqorlyq aiybymen sottalǵan Atyraý oblysynyń eks-ákimi Bergei Rysqaliev pen inisi, eks-depýtat Amanjan Rysqalievtiń tárkilengen dúnie-múlkin qaitaryp berdi. Dalanews.kz osy sheshimniń zańdylyǵyna kúmán keltirgen ekonomist Aidar Álibaevtiń oi-pikirin nazaryńyzǵa usynady.
"Bilesizder, 2012 jyly Atyraý oblysy ákimi Bergei Rysqaliev qyzmetinen qýyldy jáne birden shetelge ketip qaldy. Budan keiin tergeý bastalyp, biraz bylyqtyń beti ashyldy.
Bergeidiń memleket múlkin talan-tarajǵa salǵany, qyzmetin asyra paidalanǵany, uiymdasqan qylmystyq top qurǵany áshkere boldy.
Byltyr osyǵan qatysty ótken sot isinde Bergei men inisi Amanjan Rysqaliev syrttai sottalyp, bulardyń qosynynda bolǵan taǵy 22 adam 2,5 jyldan 15 jylǵa deiingi aralyqta jaza arqalady. Tergeý barysynda Bergei qurǵan qylmystyq top 72 mlrd teńgeden asa memleket qarajatyn qaltasyna basqany anyqtaldy.
Sot buiryǵy boiynsha aǵaiyndylarǵa tiesili 185 nysan, onyń ishinde páter, jer ýchaskileri, jer asty garajdary, jyljymaityn múlik, banktegi esep-shottar jáne basqa da materialdyq múlik tárkilendi. Muny aqshaǵa ainaldyrǵanda mlrd-pen baǵalanatyn taǵy bir kapitaldyń basy quralar edi.
Bilik aǵaiyndylardyń sońyna túsip, halyqaralyq izdeý jariialady. Osy ýaqytta tergeýshiler Bergeidiń barsha bylyqtaryn toptastyryp, tom-tom etip tikti. Sonyń nátijesinde eks-ákimge úkim shyǵarylyp, Bergei 17 jyl arqalady. Inisi Amanjan 16 jylǵa sottaldy. Syrttai. Ilgeride aitqan barlyq dúnie-múlki tárkilendi.
Osy kúnge deiin olar Angliiada ómir súrip keldi, súrip te jatyr. Alaida álgi úkimniń kúshi uzaqqa barǵan joq.
