Qazaqstannyń burynǵy joǵary laýazymdy sheneýnikteriniń biri, Aslan Mýsin otbasyna qatysy bar kompaniia Vena qalasynan quny shamamen 4,5 million eýro bolatyn elitalyq páter satyp alǵan. Málimetke sáikes, bul mámile ótken jyly qaladaǵy Noibaý aýdanyndaǵy eń qymbat jyljymaityn múlik saýdasynyń biri dep tanylǵan, dep habarlaidy Dalanews.kz.
Noibaý – Avstriia astanasynyń bedeldi ári tarihi aýdandarynyń biri, dep jazady "Vyhod k moriý" telegram arnasy. Bul jerden Vena operasy, Karlskirhe jáne qalalyq ratýshaǵa deiin jaiaý 15 minýtta jetýge bolady. Sondai-aq munda mýzei kvartaly men tanymal jaiaý júrginshiler kósheleri ornalasqan.
Dál osy aýdandaǵy tarihi ǵimarattardyń birinde Mýsinder otbasynyń apartamenti ornalasqan. Aýmaǵy 413 sharshy metr bolatyn páter 2024 jyly shamamen 4,5 million eýroǵa (sol kezdegi baǵammen 2,3 mlrd teńge) rásimdelgen.
Jyljymaityn múlik Avstriiada tirkelgen Bazantner GmbH kompaniiasynyń atyna jazylǵan. Qarjylyq esepterge qaraǵanda, Mondscheingasse kóshesindegi bul páter – kompaniianyń ázirge jalǵyz aktivi.
Kompaniiany Sergei Kýshenov basqarady. Ol Mýsinder otbasynyń sheteldegi jobalaryndaǵy burynnan kele jatqan seriktesi retinde atalady. Al kompaniia qurylymy arqyly Bolgariiadaǵy deldal uiym jáne Ras-el-Haima aýmaǵynda tirkelgen qorǵa bailanystyrylǵan.
Materialda bul qurylymdardyń Saýranbek Mýsin jáne onyń týysy Anýarbekpen bailanysy bar ekeni aitylǵan. Olar Latviia men Bolgariiadaǵy negizgi aktivterdi de basqarady delinedi.
Latviiadaǵy iri aktivter
Mýsinder otbasy Latviia aýmaǵynda da qomaqty múlikke ie. Málimetke sáikes, olar 5,6 million eýroǵa eldegi tanymal turmystyq tehnika satatyn riteilerlerdiń birin satyp alǵan. Sonymen qatar turǵyn úi nysandary da bar.
Sarapshylardyń baǵalaýynsha, otbasynyń Latviiadaǵy aktivteri 20 million eýrodan asady.
Bolgariiadaǵy aýqymdy joba
Otbasynyń negizgi biznes múddesi Bolgariia aýmaǵynda shoǵyrlanǵany aitylǵan. El astanasy Sofiia qalasynda olar birneshe jyldan beri 200 million eýrodan asatyn turǵyn jáne kommertsiialyq qurylys jobasyn júzege asyryp jatyr.
Joba aiasynda 95 myń sharshy metr keńse alańy, 60 myń sharshy metr turǵyn úi, mektepter, eki sport kesheni jáne 4,5 myń avtoturaq orny qarastyrylǵan.
Qurylys jobasyn júrgizetin Sofiia park kompaniiasy Saýranbek Mýsinniń baqylaýynda ekeni kórsetilgen. 2024 jylǵy esepke sáikes, kompaniia aktivteri 68 million eýroǵa baǵalanǵan.
Materialda Aslan Mýsinniń jubaiy Gúlbaný Úketaiqyzy men uly Saýranbek Bolgariianyń «altyn azamattyǵyn» alǵany aitylǵan. Olar jergilikti jáne Eýroparlament sailaýlaryna qatysady delinedi.
Al Aslan Mýsinniń ózi 2020 jyly Chernogoriia eliniń qurmetti azamaty atanǵan. Alaida keiin bul el biligi berilgen qurmetti azamattyqtardy tekserýdi bastaǵan.
Sondai-aq Bolgariia Shengen aimaǵyna kirgennen keiin jańa azamattardyń qarjy kózderi men natýralizatsiia negizderin tekserý kúsheiýi múmkin ekeni aitylǵan. Avtorlar osy jaǵdaiǵa bailanysty Mýsinder otbasy aktivterin Birikken Arab Ámirlikterindegi qorǵa rásimdegen bolýy yqtimal degen boljam keltiredi.
