قازاقستاننىڭ بۇرىنعى جوعارى لاۋازىمدى شەنەۋنىكتەرىنىڭ ءبىرى، اسلان مۋسين وتباسىنا قاتىسى بار كومپانيا ۆەنا قالاسىنان قۇنى شامامەن 4،5 ميلليون ەۋرو بولاتىن ەليتالىق پاتەر ساتىپ العان. مالىمەتكە سايكەس، بۇل مامىلە وتكەن جىلى قالاداعى نويباۋ اۋدانىنداعى ەڭ قىمبات جىلجىمايتىن مۇلىك ساۋداسىنىڭ ءبىرى دەپ تانىلعان، دەپ حابارلايدى Dalanews.kz.
نويباۋ – اۆستريا استاناسىنىڭ بەدەلدى ءارى تاريحي اۋداندارىنىڭ ءبىرى، دەپ جازادى "ۆىحود ك موريۋ" تەلەگرام ارناسى. بۇل جەردەن ۆەنا وپەراسى، كارلسكيرحە جانە قالالىق راتۋشاعا دەيىن جاياۋ 15 مينۋتتا جەتۋگە بولادى. سونداي-اق مۇندا مۋزەي كۆارتالى مەن تانىمال جاياۋ جۇرگىنشىلەر كوشەلەرى ورنالاسقان.
ءدال وسى اۋدانداعى تاريحي عيماراتتاردىڭ بىرىندە مۋسيندەر وتباسىنىڭ اپارتامەنتى ورنالاسقان. اۋماعى 413 شارشى مەتر بولاتىن پاتەر 2024 جىلى شامامەن 4،5 ميلليون ەۋروعا (سول كەزدەگى باعاممەن 2،3 ملرد تەڭگە) راسىمدەلگەن.
جىلجىمايتىن مۇلىك اۆستريادا تىركەلگەن Bazantner GmbH كومپانياسىنىڭ اتىنا جازىلعان. قارجىلىق ەسەپتەرگە قاراعاندا، Mondscheingasse كوشەسىندەگى بۇل پاتەر – كومپانيانىڭ ازىرگە جالعىز اكتيۆى.
كومپانيانى سەرگەي كۋشەنوۆ باسقارادى. ول مۋسيندەر وتباسىنىڭ شەتەلدەگى جوبالارىنداعى بۇرىننان كەلە جاتقان سەرىكتەسى رەتىندە اتالادى. ال كومپانيا قۇرىلىمى ارقىلى بولگارياداعى دەلدال ۇيىم جانە راس-ەل-حايما اۋماعىندا تىركەلگەن قورعا بايلانىستىرىلعان.
ماتەريالدا بۇل قۇرىلىمداردىڭ ساۋرانبەك مۋسين جانە ونىڭ تۋىسى انۋاربەكپەن بايلانىسى بار ەكەنى ايتىلعان. ولار لاتۆيا مەن بولگارياداعى نەگىزگى اكتيۆتەردى دە باسقارادى دەلىنەدى.
لاتۆياداعى ءىرى اكتيۆتەر
مۋسيندەر وتباسى لاتۆيا اۋماعىندا دا قوماقتى مۇلىككە يە. مالىمەتكە سايكەس، ولار 5،6 ميلليون ەۋروعا ەلدەگى تانىمال تۇرمىستىق تەحنيكا ساتاتىن ريتەيلەرلەردىڭ ءبىرىن ساتىپ العان. سونىمەن قاتار تۇرعىن ءۇي نىساندارى دا بار.
ساراپشىلاردىڭ باعالاۋىنشا، وتباسىنىڭ لاتۆياداعى اكتيۆتەرى 20 ميلليون ەۋرودان اسادى.
بولگارياداعى اۋقىمدى جوبا
وتباسىنىڭ نەگىزگى بيزنەس مۇددەسى بولگاريا اۋماعىندا شوعىرلانعانى ايتىلعان. ەل استاناسى سوفيا قالاسىندا ولار بىرنەشە جىلدان بەرى 200 ميلليون ەۋرودان اساتىن تۇرعىن جانە كوممەرسيالىق قۇرىلىس جوباسىن جۇزەگە اسىرىپ جاتىر.
جوبا اياسىندا 95 مىڭ شارشى مەتر كەڭسە الاڭى، 60 مىڭ شارشى مەتر تۇرعىن ءۇي، مەكتەپتەر، ەكى سپورت كەشەنى جانە 4،5 مىڭ اۆتوتۇراق ورنى قاراستىرىلعان.
قۇرىلىس جوباسىن جۇرگىزەتىن سوفيا پارك كومپانياسى ساۋرانبەك ءمۋسيننىڭ باقىلاۋىندا ەكەنى كورسەتىلگەن. 2024 جىلعى ەسەپكە سايكەس، كومپانيا اكتيۆتەرى 68 ميلليون ەۋروعا باعالانعان.
ماتەريالدا اسلان ءمۋسيننىڭ جۇبايى گۇلبانۋ ۇكەتاي قىزى مەن ۇلى ساۋرانبەك بولگاريانىڭ «التىن ازاماتتىعىن» العانى ايتىلعان. ولار جەرگىلىكتى جانە ەۋروپارلامەنت سايلاۋلارىنا قاتىسادى دەلىنەدى.
ال اسلان ءمۋسيننىڭ ءوزى 2020 جىلى چەرنوگوريا ەلىنىڭ قۇرمەتتى ازاماتى اتانعان. الايدا كەيىن بۇل ەل بيلىگى بەرىلگەن قۇرمەتتى ازاماتتىقتاردى تەكسەرۋدى باستاعان.
سونداي-اق بولگاريا شەنگەن ايماعىنا كىرگەننەن كەيىن جاڭا ازاماتتاردىڭ قارجى كوزدەرى مەن ناتۋراليزاسيا نەگىزدەرىن تەكسەرۋ كۇشەيۋى مۇمكىن ەكەنى ايتىلعان. اۆتورلار وسى جاعدايعا بايلانىستى مۋسيندەر وتباسى اكتيۆتەرىن بىرىككەن اراب امىرلىكتەرىندەگى قورعا راسىمدەگەن بولۋى ىقتيمال دەگەن بولجام كەلتىرەدى.
