Pýtinniń avantiýrasynan aldymen Sberbank zardap shekti. Sanktsiia saldarynan esep-qisap jasasý múmkindiginen aiyrylǵan reseilik bank Qazaqstandaǵy enshiles uiymdy satyp tynǵan edi.
Sberbankten muraǵa qalǵan qurylymdy sanktsiia qursaýynan shyǵarý úshin "Báiterek" biraz ter tókti. Buǵan holdingtiń sapyndaǵy sheteldik top-menedjerler úles qosty dep topshylaýǵa bolady.
"Berekeni" reprivatizatsiia jasaýǵa sheshim qabyldaǵan holding qarjy institýtynyń 100 paiyz aktsiiasyna ielik etedi.
"Báiterek" banktiń babyn biletin halyqaralyq deńgeidegi qaltaly, qaýqarly investor izdeýde. Osy arada bir niýans bar:
Dalainside arnasyna pikir bildirgen senimdi derekkóz: túp-tuqiiany Reseiden taraityn bankke "quda túsýshiler" joqtyń qasy ekenin aitty. Batys aktsionerleri Sberbanktiń shekpeninen shyqqan qurylymnyń qojaiyny atanyp repýtatsiiasyna daq túsirgisi kelmeidi. Katarlyq kásipkerler de "Berekeden" bálendei potentsial kórip turǵan joq.
Jańa Qazaqstan qytailyq investorlarǵa qolqa salýy múmkin. Biraq olardyń da mundai avantiýraǵa aralasa qoiýy ekitalai.
"Báiterektiń" bankti satý týraly shuǵyl sheshim shyǵarǵany da túrli oiǵa jeteleidi.
Sanktsiiaǵa urynbaý úshin Briýsselge sapar shekken Smaiylov úkimeti sońynan sóz ergen qurylymnan birjolata qutylý týraly uiǵarymǵa kelgendei. Bastaýyn Reseiden alatyn bankti jekeniń qolyna tabystai otyryp, sanktsiia táýekelin tómendetýge bolady.
Bizdegi aqparat boiynsha "Bereke" bank holdingtiń qaltasyna salmaq salyp otyr. Saldarynan "Báiterektiń" manevr jasaityn múmkindigi shektelip, bankten ózge mańyzdy jobalary turalap qalǵan.
"Berekeni" kim alady? "Bereke" kimge kerek? Bankten arylýdy kózdegen holding basshylyǵy úshin bul saýaldyń basy ashyq.
"Báiterek" demekshi, ulttyq kompaniia jyl basynda Batystyń úsh birdei TOP-menedjerin jumysqa shaqyrǵan.
Holding basshysy Qanat Sharlapaev nemis – Manfred Grýndke, amerikalyq Deniel Ýitt jáne frantsýz qarjygeri Mari-Elen Berardy attai qalap aldyrǵan. Bulardan kelip-keter paida bar ma?
