Qazaqstanda #ZAKONSALTANAT heshtegimen Parlamentke hat jazýǵa úndeitin aktsiia bastaldy, - dep habarlaidy Dalanews.kz.
Belsendiler árbir azamattyń daýysy, haty mańyzdy ekenin aitty.
"Bei-jai qaramańyzdar, sizderdiń daýystaryńyz mańyzdy! Zorlyq-zombylyqty qylmystyq jaýapkershilikke tartatyn, áielderdiń quqyqtary men balalardyń qaýipsizdigin qamtamasyz etý týraly zań jobasy qabyldanýyn qoldaiyq. Sizdiń hatyńyz zańnamalyq ózgeristerdi qabyldaýǵa túrtki bolýy ábden múmkin. Qaýipsiz bolashaq úshin búginnen bastap áreket etińiz!"- dep málimdedi "Erkindik qanaty" qoǵamdyq ókilderi.
Qazir Senatta "Qazaqstan Respýblikasynyń keibir zańnamalyq aktilerine áielderdiń quqyqtary men balalardyń qaýipsizdigin qamtamasyz etý máseleleri boiynsha ózgerister men tolyqtyrýlar engizý týraly" zań jobasy talqylanyp jatyr. Iaǵni otbasylyq-turmystyq jáne qoǵamdyq salalardaǵy zorlyq-zombylyqqa qatysty áreketterdi qylmystyq jaýapkershilikke tartý qarastyrylyp jatyr.
"Bizde Senatta senatorlardyń destrýktivti top belsendilerimen kýlýarlyq jáne resmi kezdesýleri ótip jatqany týraly aqparat bar. ...Uzaq jyl boiy bul adamdar eldegi jaǵdaidy turaqsyzdandyrý boiynsha jumys júrgizip keledi jáne qoǵamdy damytýǵa, adam quqyqtaryn qorǵaýǵa baǵyttalǵan zań jobalaryn qabyldaýǵa kedergi keltirip otyr", - deidi qoǵam belsendileri.
Buǵan deiin Prezident Qasym-Jomart Toqaev otbasylyq-turmystyq zorlyq-zombylyq úshin jazany qatańdatý máselesi boiynsha óz ustanymyn bildirgen bolatyn.
Qoǵam belsendileri 2017 jyly zorlyq-zombylyqqa qarsy qylmystyq shara qoldanbaý turmystyq saladaǵy qylmys tez ósýine ákep soqqanyna nazar aýdardy. Al 2023 jyly Saltanat Núkenova qatygezdikpen óltirildi, aiyptalýshy - onyń kúieýi Qýandyq Bishimbaev. Dál qazir sot protsesi júrip jatyr, ony búkil el baqylap otyr. Bishimbaevtyń taǵdyry alqabiler alqasy men sýdianyń sheshimine bailanysty bolyp otyr.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Keshegi sot otyrysynda Bishimbaev Saltanatty shashynan súirep, tepkilegen sumdyq kadrlar kórsetildi.
