Belgili qarjy sarapshysy Aıbar Oljaı ZTB jobasynyń negizin qalaýshy medıamenedjer Marǵulan Tursynovtyń ústinen prokýratýraǵa aryz túsirdi, dep habarlaıdy Dalanews.kz.

Bul týraly sarapshynyń ózi jazdy. 

"ZTB pablıginiń ıesi jazǵan "onı bolee obrazovany, otvetstvennye ı stabılnye" degen formýlırovka bir ultty bir ulttan joǵary qoıý bolyp tur. "Prevoshodstvo arııskoı rasy" degen Gıtler fashızminiń ıdeologıasy týra osylaı qurylǵan. Bul turǵyda Marǵulan Tursynov QR Qylmystyq Kodeksiniń 174 babyn buzýy múmkin. Osyny tekserý boıynsha jańa ǵana Bas prokýratýraǵa málimetterdi qosyp, aryz joldadym. Prokýratýra ne ózi tekseredi, ne İshki ister mınıstrligine joldaıdy", - deıdi Aıbar Oljaev. 

Áńgime ne jaıly? 

Áńgime Tursynovtyń Threads jelisinde jazǵan jazbasynan bastalǵan.

Til máselesi onsyz da qyzyp turǵan shaqta, Tursynov orys ultyna qatysty jazbasy otqa maı quıǵandaı boldy. 

"Sońǵy ýaqytta elimizde orystarǵa qatysty ultshyldyqtyń kúsheıýi baıqalyp otyr. Men, jergilikti ulttyń ókili retinde, moıyndaımyn - orystarǵa degen kózqarasym erekshe. Kóp jaǵdaıda túrli máseleler boıynsha men dál solarǵa júginemin. Meıli tehnıka jóndeý, kólik, dızaın, býhgalterıa sekildi máseleler bolsyn. Óıtkeni men olardy anaǵurlym bilimdi, jaýapty ári turaqty dep esepteımin. Ashyq aıtaıyn, kúndelikti ómirde olarsyz maǵan qıyn", - deıdi Marǵulan Tursynov. 

Threads qoldanýshylary medıamenedjerdiń bul jazbasyn qyzý talqylaı tústi.