Belgili advokat Janiia Bodaý "Arsyz, nadan" sózderi ar-namysty qorlaýǵa jata ma?" degen saýalǵa jaýap berdi.
Ol jelidegi jazbasynda advokattyq qyzmetinde ar-namysqa, sózben qorlaýǵa qatysty túrli daýlarda azamattardyń quqyǵyn qorǵaǵanyn atap ótken. Sonyń kópshiligi oqyrmandaryna zańdyq turǵydan saýatyn ashýǵa qajet dep biledi.
"Máselen, qazir áleýmettik jeli ómirimizdiń bir bólshegine ainalyp úlgerdi, onlain alańda túrli pikir men oi qaishylyǵy jii kórinis tabady. Sonyń arty bir-birimizdi qorlap, balaǵattaýǵa deiin jetip jatady. Keibiri sot talqysyna ótip ketedi. Osy oraida, tájirbiemdegi bir qylmystyq isti bólisip qoisam.
Belgili jýrnalistiń ústinen qarsylasy áleýmettik jelide ózin «arsyz ári nadan» degen sózdermen qorlady degen shaǵymmen sotqa júgingen. Men sotqa jýrnalistiń qorǵaýshysy retinde qatystym, maqsatym – ony aqtap shyǵý jáne aqtap shyǵatynyma senimdi boldym.
Nege? Birinshiden, «Nadan jáne arsyz» degen sózder eshqashan qorlaýǵa jatqan emes. Jalpy qorlaý degenimiz - qylmystyq quqyq buzýshylyq quramynyń mańyzdy saralaý beligisi bar nárse, iaǵni kináli adamnyń ádepsiz áreketi. Biraq aiyptaýǵa sebep bolǵan sózder bul kriteriige jatpaidy", - deidi Janiia Bodaý.
Al ekinshiden, «Qazaq ádebi tiliniń sózdigine» sáikes, arsyz – adamdyq qasieti tómen, arlanbaityn, uiatsyz degen maǵynada, al nadan – qarańǵy, bilimsiz degendi bildiredi, iaǵni adamǵa teris minezdeme bergende qoldanylady.
"Budan basqa, atalǵan sózder kórkem ádebietimizde jii kezdesedi, uly aqyn ári aǵartýshy Abaidyń Úshinshi qara sózin alsaq, onda nadan, arsyz degen tirkester qoldanǵan. Sonymen qatar maqal-mátelderimizde de bul sózder óte jii kezdesedi.
Hosh, sonymen sotta aiyptaýshy filologiialyq saraptama júrgizýdi talap etti. Biraq men qarsylyq bildirdim. Óitkeni, sotqa qatysýshylar da, sýdia da qazaq, «arsyz», «nadan» sózderiniń maǵynasyn bilmesek, nesine qazaq atanyp júrmiz? Sýdia meniń belsendigime riza bolyp, saraptamasyz birden qorǵaýymdaǵy jýrnalisti aqtap shyqty", - dep jazady advokat.
Sodan soń aiyptaýshy prokýratýrǵa shaǵym túsirgen. Bas prokýror Berik Asylov sottar filologiialyq saraptama júrgizbei, jaýapkerdi zańsyz aqtady dep, Joǵarǵy Sottan úkimniń kúshin joiýdy suraidy. Alaida, kassatsiialyq alqa Bas prokýrordyń narazalyǵyn qanaǵattandyrmai, aqtaý úkimdi ózgerissiz qaldyrǵan.
"Bul árbir qorlaý, bir qaraǵanda, ar-namys pen qadir-qasietke nuqsan keltiretin qorlaý sózderi nemese aqparat bola almaitynynyń naqty ári qyzyqty mysaly", - dep atap ótedi Janiia Bodaý.
