Qairat Satybaldy isine bailanysty memleketke qaitarylǵan aktivter qaitadan aýktsionǵa shyǵaryldy. Saýda 26 mamyrǵa josparlanǵan, dep habarlaidy dalanews.kz.
Aýktsionǵa qoiylǵan nysandar qatarynda Almatydaǵy «Baisat» bazary men Astanadaǵy kamini men freskasy bar elitalyq páterler bar.
Satylymǵa shyǵarylǵan barlyq aktivterdiń jalpy quny 30 mlrd teńgeden asady.
Almatydaǵy Soltústik ainalma kóshesinde ornalasqan «Baisat» bazary buǵan deiin de birneshe márte satylymǵa qoiylǵan. 2025 jyldyń kúzinde onyń baǵasy 24,77 mlrd teńgege deiin tómendetilgenimen, satyp alýshy tabylmaǵan. Endi aktivtiń bastapqy baǵasy qaita kóterilip, 28,6 mlrd teńge bolyp belgilendi.
Aýktsion sipattamasynda «Kóterme-bólshek saýda ortalyǵy» JShS-niń jarǵylyq kapitalyndaǵy 100 paiyz úles satylymǵa shyǵarylǵany aitylǵan.
Qaitarylǵan aktivterdi basqarý kompaniiasynyń málimetinshe, bazar – turaqty aqsha ainalymy bar, klienttik bazasy qalyptasqan jáne infraqurylymy damyǵan daiyn kommertsiialyq nysan. Naryqta orta eseppen 62 adam jumys isteidi. Ortalyqtyń jarǵylyq kapitaly 26,3 mlrd teńgeni quraidy. Baǵalaý kezindegi tabysy – 2,7 mlrd teńge.
2025 jyldyń qyrkúiegindegi málimet boiynsha kásiporynnyń taza paidasy 1,2 mlrd teńgeden asqan.
Nysan 2024 jyldyń qańtarynda Almaty ekonomikalyq sotynyń sheshimimen tolyqtai memleket menshigine qaitarylǵan. Sot «Almaty jylý holdingi» kesheniniń (qazirgi «Baisat» bazary) múlkine qatysty barlyq mámileni zańsyz dep tanyp, kúshin joiǵan.
Qala prokýratýrasy sot barysynda keshenniń zańsyz satylǵany dáleldengenin habarlaǵan. Áńgime jalpy aýmaǵy 4,2 myń sharshy metrden asatyn úsh nysan men 1,4 gektar jer telimi týraly bolǵan. Olar QazGerStroi birlesken kásiporny men Astana Financial Group menshiginde bolǵan. Prokýratýra bul eki kompaniianyń ózara bailanysty ekenin jáne olardyń Qairat Satybaldynyń ulyna tiesili bolǵanyn málimdegen.
Buǵan deiin Qairat Satybaldy sotqa deiingi tergeý aiasynda óz baqylaýyndaǵy «Baisat» bazarynyń basym bóligin memleketke óz erkimen qaitarǵan bolatyn. 2022 jyldyń 26 qyrkúieginde ol Qazaqtelekom men TsTS isi boiynsha asa iri kólemde qarjy jymqyrdy degen aiyppen alty jylǵa bas bostandyǵynan aiyrylǵan.
