Qazaqstandaǵy úsh birdei sot instantsiiasy, sonyń ishinde kassatsiialyq sot Qyzylorda turǵyny Baǵlan Jumahanovtan shamamen 900 myń teńge óndirý týraly sheshim shyǵarǵan. Eń soraqysy — ol birde-bir sot otyrysyna qatyspaǵan, protsess týraly habarlanbaǵan jáne daýǵa sebep bolǵan aqshany eshqashan almaǵan. Muny eki banktiń resmi anyqtamalary da rastap otyr, dep habarlaidy dalanews.kz.
Oqiǵa qalai bastalǵan?
2024 jyldyń kúzinde Aqmola oblysynyń turǵyny Mariia Lakizo telefon alaiaqtarynyń qurbany bolǵan. Alaiaqtar marketpleiste jumys usynǵan bolyp, ony túrli bank shottaryna 8,5 million teńgeden astam qarjy aýdarýǵa kóndirgen.
Keiin Lakizo sotqa júginip, aqshasy aýdarylǵan shot ielerinen negizsiz baiý retinde qarajatty óndirip berýdi talap etken. Talap aryzda jaýapkerlerdiń biri retinde Bereke Bank kartasynyń iesi dep kórsetilgen «Jumahanov Baglan Jýmahanovich» jazylǵan. Bul kartaǵa 805 250 teńge aýdarylǵan.
Sot isti qarap, aqshany óndirip berý týraly sheshim shyǵarǵan.
Alaida aqsha «Jýmahanovichten» emes, «Begimjanulynan» óndirilgen. Iaǵni aty-jóni uqsas bolǵanymen, ákesiniń aty basqa múlde bólek adam jaýapker bolyp ketken.
Sotta bolmaǵan adam
Baǵlan Begimjanuly Jumahanov — Qyzylordanyń qarapaiym turǵyny. Jumys isteidi, jalaqy alady. Onyń aty sotta jaýapker retinde atalyp jatqanynan múlde habarsyz bolǵan.
2026 jylǵy 10 naýryzdaǵy kassatsiialyq sot qaýlysynda da bul jait ashyq jazylǵan. Qujatta Jumahanovtyń birinshi jáne apelliatsiialyq instantsiia sottarynyń otyrystary týraly tiisti túrde habarlanbaǵany kórsetilgen. Ol sot sheshiminiń kóshirmesin tek 10 ai ótken soń — 2025 jyldyń qazan aiynda ǵana alǵan.
Keiin jaǵdaidan habardar bolǵan Baǵlan ózin qorǵaý úshin bankterden anyqtama suratqan.
Bankter ne deidi?
Bereke Bank-tiń jaýaby naqty bolǵan. Bank málimetinshe, Jumahanov Baǵlan Begimjanuly, JSN iesi banktiń klienti emes. Mariia Lakizo aqsha aýdarǵan kartasy oǵan tirkelmegen.
Banktiń Qyzylorda filialy da bul adamnyń Bereke Bank-te eshqashan shoty bolmaǵanyn rastaǵan.
Al Halyk Bank usynǵan 2024 jylǵa arnalǵan úzindi kóshirmede Lakizodan túsken birde-bir aýdarym joq. Shotqa túsken qarjynyń bári tek jumys berýshilerden aýdarylǵan jalaqy ekeni kórsetilgen.
Iaǵni jábirlenýshiniń aqshasy Baǵlan Jumahanovtyń esepshotyna eshqashan túspegen. Ol eshqandai paida kórmegen jáne bul iske qatysy bolmaǵan. Tek alaiaqtar karta rásimdeý kezinde paidalanǵan adamnyń aty-jónimen sáikes kelip qalǵan.
Úsh instantsiia - bir qate
Birinshi instantsiia da, apelliatsiia da, kassatsiia da Baǵlan Begimjanulynyń daýly kartanyń naqty iesi ekenin teksermegen.
Talap aryzdaǵy ákesiniń aty men naqty adamnyń ákesiniń aty sáikes kelmese de, sottar úshin JSN-niń sáikes kelýi jetkilikti bolǵan.
Kassatsiialyq sot onyń protsess týraly habarlanbaǵanyn moiyndaǵanymen, sheshimdi ózgerissiz qaldyrǵan. Sot logikasy dálelden góri qarapaiym bolǵan: aqsha uqsas aty bar kartaǵa tústi — demek, sol adam qaitarýy kerek.
Osylaisha bul iste eki adam japa shekken: alaiaqtarǵa aldanyp aqshasynan aiyrylǵan Mariia Lakizo jáne ózine qatysy joq qaryzdy óteýge májbúr bolǵan Baǵlan Jumahanov.
Joǵarǵy sot sheshim shyǵarǵanǵa deiin Baǵlannyń shotynan májbúrli túrde shamamen 894 myń teńge óndirip alý qaýpi tónip tur. Ol bul aqshany eshqashan almaǵan, al qazirgi tabys deńgeiimen bul somany óteýge jyldar ketýi múmkin.
Qazir ne bolyp jatyr?
Baǵlan Jumahanovtyń múddesin astanalyq zań keńesshisi Arys Danagatov qorǵap jatyr. Qazir Qazaqstan Joǵarǵy sotyna Azamattyq protsestik kodekstiń 54-1-taraýy tártibimen sot aktilerin qaita qaraý týraly ótinish joldanǵan.
Joǵarǵy sot sheshim shyǵarǵanǵa deiin Baǵlannyń shotynan májbúrli túrde shamamen 894 myń teńge óndirip alý qaýpi saqtalyp otyr. Onyń tabys deńgeiin eskersek, bul somany óteýge birneshe jyl ketýi múmkin.
Ókil ne deidi?
Jumahanovtyń ókili Arys Danagatov bul oqiǵa adamnyń aty-jóni sáikes kelgeni úshin ǵana úsh birdei sot instantsiiasy onyń eshqashan almaǵan aqshasyn óndirip bergenin kórsetetinin aitty.
– Bizdiń klient eshqashan almaǵan aqshany odan óndirip alý týraly sheshim shyǵaryldy. Bank onyń daýly kartanyń iesi emes ekenin resmi túrde rastady. Bul anyqtamalar kassatsiiaǵa deiin bolǵan, biraq sottar olardy suratpaǵan. Joǵarǵy sot ádildikti qalpyna keltirip, adamdy bóten qateliktiń saldarynan qorǵaidy dep senemiz, – dedi Arys Danagatov.
