Astana qalasynyń Ekonomikalyq tergep-tekserý departamentiniń qyzmetkerleri «Zań men tártip» qaǵidaty aiasynda «Saryarqa» aýdany ákimdigi apparatymen birlesip, aýdandyq Ardagerler keńesiniń múshelerimen aýqymdy aqparattyq-túsindirý kezdesýin ótkizdi, dep habarlaidy dalanews.kz.
Is-shara Memleket basshysynyń «Zań men tártip» qaǵidatyn qamtamasyz etý jónindegi tapsyrmalaryn júzege asyrý aiasynda uiymdastyrylyp, halyqtyń qarjylyq saýattylyǵyn arttyrýǵa baǵyttaldy.
Kezdesýdiń negizgi maqsaty – zeinetkerlerdi qarjy piramidalaryn taný tásilderine úiretý jáne internet-alaiaqtardan qorǵaný joldaryn túsindirý. Egde jastaǵy azamattar ekonomikalyq qylmystarǵa jii aldanatyn osal toptardyń biri bolǵandyqtan, aldyn alý jumystary quqyq qorǵaý organdary qyzmetiniń basty baǵyttarynyń biri sanalady.
Kezdesý barysynda vedomstvo ókilderi joǵary tabys ýáde etetin kúmándi investitsiialyq jobalarǵa aldanbaý úshin qarjy piramidalarynyń belgilerin; bank esepshottaryn telefon jáne internet-alaiaqtardan qorǵaýǵa arnalǵan tsifrlyq gigiena negizderin; kúmándi qarjylyq usynystarǵa tap bolǵan jaǵdaida qaida júginý kerektigin jan-jaqty túsindirdi.
Kezdesý formaty ardagerlerge Ekonomikalyq tergep-tekserý departamenti qyzmetkerleri men aýdan ákimdigi ókilderine ózderin tolǵandyrǵan suraqtardy tikelei qoiýǵa múmkindik berdi.
Qatysýshylarǵa jinaqty qaýipsiz saqtaý tásilderi men tólem kartalaryn paidalaný erejeleri boiynsha praktikalyq keńester berildi.
«Zańdylyq pen quqyqtyq tártip ár azamattyń habardar bolýynan bastalady. Bizdiń mindetimiz – ardagerlerge qarajatyn jáne tynyshtyǵyn saqtaýǵa kómektesetin bilim berý», – dep atap ótti Ekonomikalyq tergep-tekserý departamentiniń ókilderi.
Mundai túsindirý sharalary elordanyń barlyq aýdanynda júieli túrde ótkizilip keledi.
