Qazaqstanda ymdaý tilin zań deńgeiinde tolyqqandy til retinde moiyndaý usynyldy, dep habarlaidy dalanews.kz.
Májilis depýtaty Ekaterina Smoliakova eldegi estý jáne sóileý qabileti buzylǵan azamattardyń quqyqtary áli kúnge deiin tolyq qorǵalmai otyrǵanyn málimdedi.
Depýtattyń aitýynsha, búginde Qazaqstanda estý jáne sóileý qabiletinde buzylysy bar 30 myńnan astam adam turady. Onyń shamamen 5 myńy balalar.
«Olar úshin ymdaý tili jai ǵana qarym qatynas quraly emes. Bul olardyń álemmen bailanysy. Bul olardyń tili. Biraq Qazaqstanda ymdaý tili áli kúnge deiin zań júzinde moiyndalmaǵan. Sonyń saldarynan myńdaǵan azamat aqparatqa, bilimge, jumysqa, memlekettik qyzmetterge tolyq qol jetkize almai otyr. Bul teń múmkindik máselesi», - dedi Smoliakova Májilis otyrysynda.
Onyń sózinshe, qazirgi áleýmettik kodekste ymdaý tili tulǵaaralyq qarym qatynas tili retinde tanylmaǵan.
«Bizde ymdaý tili derbes til retinde emes, tek sýrdoaýdarma aiasynda ǵana qarastyrylady. Bul úlken másele. Adam óz tilinde aqparat alyp, erkin ómir súre alýy kerek», - dedi depýtat.
Smoliakova taǵy bir ótkir másele retinde sýrdoaýdarmaǵa bólinetin ýaqyt limitin atady.
Qazir Qazaqstanda estý qabileti buzylǵan azamattarǵa jylyna nebári 60 saǵat sýrdoaýdarma qyzmeti beriledi.
«60 saǵat bir jylǵa jetpeidi. Tipti kúndelikti ómirge de jetpeidi. Adam aýrýhanaǵa barýy kerek, memlekettik qyzmet alýy kerek, oqýy, jumys isteýi, qoǵamda ómir súrýi kerek. Al biz sonyń bárine jylyna 60 saǵat qana bólip otyrmyz», - dep ashýlandy depýtat.
Májilismenniń aitýynsha, aqparattyq qoljetimdilik máselesi de óte ózekti bolyp otyr.
Qazir telearnalar sýrdoaýdarma nemese sýbtitrmen tek jańalyq baǵdarlamalaryn ǵana kórsetýge mindetti. Al kóptegen podkast, suhbat, derekti filmder, teatrlar men mýzeiler estý qabileti buzylǵan azamattar úshin qoljetimsiz kúide qalyp otyr.
Osyǵan bailanysty Ekaterina Smoliakova Úkimetke birneshe naqty talap qoidy.
Atap aitqanda, ymdaý tilin zańnamalyq deńgeide tolyqqandy til retinde moiyndaý, ony bilim berý, meditsina, sot júiesi, memlekettik qyzmet pen BAQ-ta qoldanýǵa naqty kepildik berý, sýrdoaýdarma limitin qaita qaraý, sýrdoaýdarmasy men sýbtitri bar kontent kólemin kóbeitý jáne sýrdopedagog mamandaryn daiarlaý kólemin arttyrý usynyldy.
«Estý qabileti buzylǵan azamattarǵa teń múmkindik berý qaiyrymdylyq emes. Bul ádiletti memlekettiń belgisi», - dep túiindedi depýtat.
