بەلگىلى ادۆوكات جانيا بوداۋ "ارسىز، نادان" سوزدەرى ار-نامىستى قورلاۋعا جاتا ما؟" دەگەن ساۋالعا جاۋاپ بەردى.
ول جەلىدەگى جازباسىندا ادۆوكاتتىق قىزمەتىندە ار-نامىسقا، سوزبەن قورلاۋعا قاتىستى ءتۇرلى داۋلاردا ازاماتتاردىڭ قۇقىعىن قورعاعانىن اتاپ وتكەن. سونىڭ كوپشىلىگى وقىرماندارىنا زاڭدىق تۇرعىدان ساۋاتىن اشۋعا قاجەت دەپ بىلەدى.
"ماسەلەن، ءقازىر الەۋمەتتىك جەلى ءومىرىمىزدىڭ ءبىر بولشەگىنە اينالىپ ۇلگەردى، ونلاين الاڭدا ءتۇرلى پىكىر مەن وي قايشىلىعى ءجيى كورىنىس تابادى. سونىڭ ارتى ءبىر-بىرىمىزدى قورلاپ، بالاعاتتاۋعا دەيىن جەتىپ جاتادى. كەيبىرى سوت تالقىسىنا ءوتىپ كەتەدى. وسى ورايدا، تاجىربيەمدەگى ءبىر قىلمىستىق ءىستى ءبولىسىپ قويسام.
بەلگىلى ءجۋرناليستىڭ ۇستىنەن قارسىلاسى الەۋمەتتىك جەلىدە ءوزىن «ارسىز ءارى نادان» دەگەن سوزدەرمەن قورلادى دەگەن شاعىممەن سوتقا جۇگىنگەن. مەن سوتقا ءجۋرناليستىڭ قورعاۋشىسى رەتىندە قاتىستىم، ماقساتىم – ونى اقتاپ شىعۋ جانە اقتاپ شىعاتىنىما سەنىمدى بولدىم.
نەگە؟ بىرىنشىدەن، «نادان جانە ارسىز» دەگەن سوزدەر ەشقاشان قورلاۋعا جاتقان ەمەس. جالپى قورلاۋ دەگەنىمىز - قىلمىستىق قۇقىق بۇزۋشىلىق قۇرامىنىڭ ماڭىزدى سارالاۋ بەلىگىسى بار نارسە، ياعني كىنالى ادامنىڭ ادەپسiز ارەكەتى. ءبىراق ايىپتاۋعا سەبەپ بولعان سوزدەر بۇل كريتەرييگە جاتپايدى"، - دەيدى جانيا بوداۋ.
ال ەكىنشىدەن، «قازاق ادەبي ءتىلىنىڭ سوزدىگىنە» سايكەس، ارسىز – ادامدىق قاسيەتى تومەن، ارلانبايتىن، ۇياتسىز دەگەن ماعىنادا، ال نادان – قاراڭعى، ءبىلىمسىز دەگەندى بىلدىرەدى، ياعني ادامعا تەرىس مىنەزدەمە بەرگەندە قولدانىلادى.
"بۇدان باسقا، اتالعان سوزدەر كوركەم ادەبيەتىمىزدە ءجيى كەزدەسەدى، ۇلى اقىن ءارى اعارتۋشى ابايدىڭ ءۇشىنشى قارا ءسوزىن الساق، وندا نادان، ارسىز دەگەن تىركەستەر قولدانعان. سونىمەن قاتار ماقال-ماتەلدەرىمىزدە دە بۇل سوزدەر وتە ءجيى كەزدەسەدى.
حوش، سونىمەن سوتتا ايىپتاۋشى فيلولوگيالىق ساراپتاما جۇرگىزۋدى تالاپ ەتتى. ءبىراق مەن قارسىلىق ءبىلدىردىم. ويتكەنى، سوتقا قاتىسۋشىلار دا، سۋديا دا قازاق، «ارسىز»، «نادان» سوزدەرىنىڭ ماعىناسىن بىلمەسەك، نەسىنە قازاق اتانىپ ءجۇرمىز؟ سۋديا مەنىڭ بەلسەندىگىمە ريزا بولىپ، ساراپتاماسىز بىردەن قورعاۋىمداعى ءجۋرناليستى اقتاپ شىقتى"، - دەپ جازادى ادۆوكات.
سودان سوڭ ايىپتاۋشى پروكۋراتۋرعا شاعىم تۇسىرگەن. باس پروكۋرور بەرىك اسىلوۆ سوتتار فيلولوگيالىق ساراپتاما جۇرگىزبەي، جاۋاپكەردى زاڭسىز اقتادى دەپ، جوعارعى سوتتان ۇكىمنىڭ كۇشىن جويۋدى سۇرايدى. الايدا، كاسساسيالىق القا باس پروكۋروردىڭ نارازالىعىن قاناعاتتاندىرماي، اقتاۋ ۇكىمدى وزگەرىسسىز قالدىرعان.
"بۇل ءاربىر قورلاۋ، ءبىر قاراعاندا، ار-نامىس پەن قادىر-قاسيەتكە نۇقسان كەلتىرەتىن قورلاۋ سوزدەرى نەمەسە اقپارات بولا المايتىنىنىڭ ناقتى ءارى قىزىقتى مىسالى"، - دەپ اتاپ وتەدى جانيا بوداۋ.
