Kólik mınıstri Marat Qarabaev Bek Air áýe kompanıasynyń ushaq apatyna qatysty tergeý máselesin túsindirdi, - dep habarlaıdy Dalanews.kz.
Mınıstr tergeýdiń qaıta bastalýy múmkin ekenin joqqa shyǵarmady.
"Tergeý aıaqtaldy, biraq qazirgi ýaqytta áýe kompanıasynyń bir qyzmetkerinen ótinish tústi. Sol ótinishke sáıkes, tergeýdi qaıta bastaý máselesi rásimdik turǵyda qarastyrylýda", – dedi Qarabaev Májilistegi brıfıńte.
Mınıstr tergeý barysyn baqylaýda ustaıtynyn aıtty.
"Bul máselemen bizdiń vedomstvonyń departamenti aınalysady jáne bul meniń fýnksıonaldyq mindetterimniń biri", – dep qosty ol.
Eske salaıyq, Bek Air ushaǵynyń áýe apaty 2019 jyldyń 27 jeltoqsanynda bolǵan edi. Ushaq Almatydan Astanaǵa (ol kezde Nur-Sultan) baǵyt alǵan bolatyn, biraq ushqannan keıin birden bıiktigin joǵaltyp, qorshaýdy buzyp, áýejaı mańyndaǵy eki qabatty kotejge soǵyldy. Ushaq bortynda 93 jolaýshy jáne bes ekıpaj múshesi bolǵan. Apat saldarynan 12 adam qaza tapty.
2021 jyldyń mamyrynda Talǵar aýdanynyń birneshe jergilikti sheneýnigi men rıeltor 2019 jyly Bek Air ushaǵy apatqa ushyraǵan Gúldala aýylyndaǵy jerlerdi satý isi boıynsha aıypty dep tanyldy. Olar ártúrli jaza merzimderine kesildi. 2022 jyldyń maýsymynda Almaty áýejaıy mańyndaǵy jerlerdi zańsyz ıemdenip, satý isi boıynsha Talǵar aýdany ákimdiginiń birneshe burynǵy sheneýnigi sottaldy.
