كولىك ءمينيسترى مارات قارابايەۆ Bek Air اۋە كومپانياسىنىڭ ۇشاق اپاتىنا قاتىستى تەرگەۋ ماسەلەسىن ءتۇسىندىردى، - دەپ حابارلايدى Dalanews.kz.
مينيستر تەرگەۋدىڭ قايتا باستالۋى مۇمكىن ەكەنىن جوققا شىعارمادى.
"تەرگەۋ اياقتالدى، ءبىراق قازىرگى ۋاقىتتا اۋە كومپانياسىنىڭ ءبىر قىزمەتكەرىنەن ءوتىنىش ءتۇستى. سول وتىنىشكە سايكەس، تەرگەۋدى قايتا باستاۋ ماسەلەسى راسىمدىك تۇرعىدا قاراستىرىلۋدا"، – دەدى قارابايەۆ ماجىلىستەگى بريفينگتە.
مينيستر تەرگەۋ بارىسىن باقىلاۋدا ۇستايتىنىن ايتتى.
"بۇل ماسەلەمەن ءبىزدىڭ ۆەدومستۆونىڭ دەپارتامەنتى اينالىسادى جانە بۇل مەنىڭ فۋنكسيونالدىق مىندەتتەرىمنىڭ ءبىرى"، – دەپ قوستى ول.
ەسكە سالايىق، Bek Air ۇشاعىنىڭ اۋە اپاتى 2019 جىلدىڭ 27 جەلتوقسانىندا بولعان ەدى. ۇشاق الماتىدان استاناعا (ول كەزدە نۇر-سۇلتان) باعىت العان بولاتىن، ءبىراق ۇشقاننان كەيىن بىردەن بيىكتىگىن جوعالتىپ، قورشاۋدى بۇزىپ، اۋەجاي ماڭىنداعى ەكى قاباتتى كوتتەدجگە سوعىلدى. ۇشاق بورتىندا 93 جولاۋشى جانە بەس ەكيپاج مۇشەسى بولعان. اپات سالدارىنان 12 ادام قازا تاپتى.
2021 جىلدىڭ مامىرىندا تالعار اۋدانىنىڭ بىرنەشە جەرگىلىكتى شەنەۋنىگى مەن ريەلتور 2019 جىلى Bek Air ۇشاعى اپاتقا ۇشىراعان گۇلدالا اۋىلىنداعى جەرلەردى ساتۋ ءىسى بويىنشا ايىپتى دەپ تانىلدى. ولار ءارتۇرلى جازا مەرزىمدەرىنە كەسىلدى. 2022 جىلدىڭ ماۋسىمىندا الماتى اۋەجايى ماڭىنداعى جەرلەردى زاڭسىز يەمدەنىپ، ساتۋ ءىسى بويىنشا تالعار اۋدانى اكىمدىگىنىڭ بىرنەشە بۇرىنعى شەنەۋنىگى سوتتالدى.
