Brifing barysynda jýrnalisterdiń suraǵyna jaýap bergen Hab basshysy memlekettik qyzmetkerlerdiń jumys ýaqyty aiaqtalǵannan keiin de túnge deiin qyzmet atqaratyndyǵyna qatysty óz oiyn jetkizdi.
«Memlekettik qyzmetkerlerdiń jumys ýaqyty aiaqtalsa da, keńsede túnge deiin qalýy - memlekettik organdardyń menedjmentindegi ózekti máseleniń biri. Bul rette birneshe másele bar. Birinshiden, laýazym ieleri arasynda jaýapkershilikti shekteýdi jetildirý kerek. Ministrliktiń ishinde kim strategiialyq baqylaýmen ainalysady, kim kúndelikti basqarýmen ainalysady degen ministr orynbasarlary men jaýapty hatshy arasyndaǵy arajikti odan ary naqtylaý kerek. Ekinshiden, memlekettik organdardyń birazynda áli de qaǵazbastylyq basym jáne osy qaǵaz ainalymyn taldaityn bolsańyz, onyń birazy ózinen ózi týyndaǵan, shyn máninde mazmundyq ólshemi joq qaǵazdar. Sondyqtan qadaǵalaý ári baqylaý júiesinde joǵary organnyń tómengi organdy qadaǵalaǵandy jai ǵana formaldy emes, strategiialyq nátijelerge qol jetkizýge ekpin qoiylýy kerek. Bul álemdik úderis»,-dedi Á. Báimenov.
Sonymen qatar, ol bul máseleniń qazirgi qoǵamymyzdaǵy eń ózekti máselelerdiń biri ekenine toqtala kelip, ony tiimdi júieleýge mekeme basshylarynyń jumysty tiimdi júrgize almaýynda degendi aitty.
«Memlekettik organdardyń basshylar úshin menedjment, onyń ústine jobalaý menedjmenti, ýaqyt menedjmenti sekildi biliktilikterin kóterý kýrstaryn ótkizý kerek dep oilaimyn. Eger memlekettik qyzmetkerler túngi saǵat 10-11-ge deiin jumys isteitin bolsa, olardyń jumys ýaqytyndaǵy eńbek ónimdiligi kúrt tómendeitinin zertteýler anyq kórsetip otyr. Olar 6-7 saǵatta jasaityn jumysyn atqarýǵa qaýqarsyz bolady. Ol úshin qyzmetkerlerdi naqty iske jumyldyra bilý kerek. Bul memlekettik organdardyń ishindegi menedjmentti jetildýrýge qazir basty nazar aýdarý kerek ekenin jáne memlekettik qyzmettegi korporativtik mádenietti jetildirýdiń mańyzdylyǵyn ańǵartýda. Sonymen qatar qaramaǵyndaǵy sarapshylardyń bilimin sheshim qabyldaǵanda durys paidala bilýge mán berý kerek», - Astanadaǵy Memlekettik qyzmet salasyndaǵy Óńirlik hab basshysy.
