بايمەنوۆ: "قاعازباستىلىقتىڭ كەسىرىنەن جۇمىس تۇنگە دەيىن سوزىلادى"

Dalanews 28 قىر. 2016 16:56 293

ورتالىق كوممۋنيكاسيالار قىزمەتىندە وتكەن استاناداعى مەملەكەتتىك قىزمەت سالاسىنداعى وڭىرلىك حاب پەن بۇۇ دامۋ باعدارلاماسىنىڭ سينگاپۋرداعى مەملەكەتتىك قىزمەتتى جەتىلدىرۋ عالامدىق ورتالىعى بىرلەسىپ شىعارعان «مەملەكەتتىك قىزمەت دامۋىنداعى جاھاندىق جانە ايماقتىق ترەندتەر» اتتى كەڭ كولەمدى زەرتتەۋ ەڭبەگىنىڭ تۇساۋ كەسەرىنە قاتىستى باسپا ءسوز ءماسىليحاتىندا ءاليحان بايمەنوۆ مالىمدەدى، دەيدى BAQ.kz ءتىلشىسى.

بريفينگ بارىسىندا جۋرناليستەردىڭ سۇراعىنا جاۋاپ بەرگەن حاب باسشىسى مەملەكەتتىك قىزمەتكەرلەردىڭ جۇمىس ۋاقىتى اياقتالعاننان كەيىن دە تۇنگە دەيىن قىزمەت اتقاراتىندىعىنا قاتىستى ءوز ويىن جەتكىزدى.
«مەملەكەتتىك قىزمەتكەرلەردىڭ جۇمىس ۋاقىتى اياقتالسا دا، كەڭسەدە تۇنگە دەيىن قالۋى - مەملەكەتتىك ورگانداردىڭ مەنەدجمەنتىندەگى وزەكتى ماسەلەنىڭ ءبىرى. بۇل رەتتە بىرنەشە ماسەلە بار. بىرىنشىدەن، لاۋازىم يەلەرى اراسىندا جاۋاپكەرشىلىكتى شەكتەۋدى جەتىلدىرۋ كەرەك. مينيسترلىكتىڭ ىشىندە كىم ستراتەگيالىق باقىلاۋمەن اينالىسادى، كىم كۇندەلىكتى باسقارۋمەن اينالىسادى دەگەن مينيستر ورىنباسارلارى مەن جاۋاپتى حاتشى اراسىنداعى اراجىكتى ودان ارى ناقتىلاۋ كەرەك. ەكىنشىدەن، مەملەكەتتىك ورگانداردىڭ ءبىرازىندا ءالى دە قاعازباستىلىق باسىم جانە وسى قاعاز اينالىمىن تالدايتىن بولساڭىز، ونىڭ ءبىرازى وزىنەن ءوزى تۋىنداعان، شىن مانىندە مازمۇندىق ولشەمى جوق قاعازدار. سوندىقتان قاداعالاۋ ءارى باقىلاۋ جۇيەسىندە جوعارى ورگاننىڭ تومەنگى ورگاندى قاداعالاعاندى جاي عانا فورمالدى ەمەس، ستراتەگيالىق ناتيجەلەرگە قول جەتكىزۋگە ەكپىن قويىلۋى كەرەك. بۇل الەمدىك ۇدەرىس»،-دەدى ءا. بايمەنوۆ.

سونىمەن قاتار، ول بۇل ماسەلەنىڭ قازىرگى قوعامىمىزداعى ەڭ وزەكتى ماسەلەلەردىڭ ءبىرى ەكەنىنە توقتالا كەلىپ، ونى ءتيىمدى جۇيەلەۋگە مەكەمە باسشىلارىنىڭ جۇمىستى ءتيىمدى جۇرگىزە الماۋىندا دەگەندى ايتتى.
«مەملەكەتتىك ورگانداردىڭ باسشىلار ءۇشىن مەنەدجمەنت، ونىڭ ۇستىنە جوبالاۋ مەنەدجمەنتى، ۋاقىت مەنەدجمەنتى سەكىلدى بىلىكتىلىكتەرىن كوتەرۋ كۋرستارىن وتكىزۋ كەرەك دەپ ويلايمىن. ەگەر مەملەكەتتىك قىزمەتكەرلەر تۇنگى ساعات 10-11-گە دەيىن جۇمىس ىستەيتىن بولسا، ولاردىڭ جۇمىس ۋاقىتىنداعى ەڭبەك ونىمدىلىگى كۇرت تومەندەيتىنىن زەرتتەۋلەر انىق كورسەتىپ وتىر. ولار 6-7 ساعاتتا جاسايتىن جۇمىسىن اتقارۋعا قاۋقارسىز بولادى. ول ءۇشىن قىزمەتكەرلەردى ناقتى ىسكە جۇمىلدىرا ءبىلۋ كەرەك. بۇل مەملەكەتتىك ورگانداردىڭ ىشىندەگى مەنەدجمەنتتى جەتىلدۋرۋگە ءقازىر باستى نازار اۋدارۋ كەرەك ەكەنىن جانە مەملەكەتتىك قىزمەتتەگى كورپوراتيۆتىك مادەنيەتتى جەتىلدىرۋدىڭ ماڭىزدىلىعىن اڭعارتۋدا. سونىمەن قاتار قاراماعىنداعى ساراپشىلاردىڭ ءبىلىمىن شەشىم قابىلداعاندا دۇرىس پايدالا بىلۋگە ءمان بەرۋ كەرەك»، - استاناداعى مەملەكەتتىك قىزمەت سالاسىنداعى وڭىرلىك حاب باسشىسى.

ۇسىنىلعان
سوڭعى جاڭالىقتار