Eks-senator, memleket jáne qoǵam qairatkeri Murat Baqtiiaruly elimizdegi qazba bailyqtyń qytailarǵa ketip jatqanyna qapalandy. Bul týraly ol Facebook paraqshasynda jazdy, dep habarlaidy Dalanews.kz.
Ol Syr óńirindegi eń iri kompaniianyń jai-kúiin qozǵady.
"Týǵan jerim Qyzylorda óńirindegi óte tabysty jumys jasap turǵan eń iri Qumkól munai-gaz kompaniiasy ( munai qory 300 mln barrel) 1997 jyly Kanadalyq “ PetroQazaqstan” kompaniiasynyń menshigine ótti. Nege satyldy, qanshaǵa satyldy, munyń sońynda kimder turdy? Parlamentte júrgende birneshe ret osy suraqtarǵa jaýap alýǵa umtyldym, biraq tushymdy málimet alamadym. Ol kezde aqparat alýǵa múmkindik berilmedi. 2005 jyly bul kompaniia aiaq astynan saýdaǵa shyǵarylyp, Kanadalyqtar bizdiń bailyǵymyzdy Qytaidyń SNPS kompaniiasyna 4 mld dollarǵa satyp paida kórdi.Bul munai orny 2013 jylǵa deiin jylyna 6 mln tonna munai óndirip satty. Meniń esebimshe Qytailyqtar 4 mld. shyǵynyn eki jylda jaýyp, osy kezge deiin taza paidamen otyr. Shymkenttegi “ShNOS” munai óndirý zavody jartylai Qytai menshiginde. Jalpy elimizdegi munai- gaz óndirisiniń Aqtóbe oblysy boiynsha 90%, Qyzylorda óńiri boiynsha 65%, Atyraý- Mańǵystaý oblystary boiynsha basym kópshiligi sheteldik kompaniialardyń úlesinde" - deidi eks-senator.
Osy tusta ol iri strategiialyq nysandardy elge qaitarýǵa áli de múmkindik bar ekenin alǵa tartty.
"Alysqa barmai-aq, kórshi Ázerbaijan elinde barlyq munai óndirisi tek memlekettiń menshiginde. Ózbekstandaǵy gaz oryndary tolyq memleket qaraýynda. Qazir qoǵam ózgerdi, sana ózgerýde, ótken otyz jylymyzǵa tas laqtyrýdan aýlaqpyn, óitkeni ol barlyǵymyzdyń tarihymyz, biraq ádiletsiz túrde shetelge arzan baǵalarǵa satylyp ketken iri strategiialyq nysandardy ( munai, gaz, mys, hrom, aliýmenii, kómir t.b. ) Ata zańymyzǵa jáne halyqaralyq normalarǵa súiene otyryp memleket menshigine qaitarýǵa tolyq múmkindik bar" - dep jazba qaldyrdy Murat Baqtiiaruly.
