Astanada Aray Media Group kompaniiasynyń býhgalteri Rizagúl Mahmetova 280 mln teńgeni jymqyrdy degen aiyppen 7 jylǵa sottaldy, dep habarlaidy Dalanews.kz Nege.aqsha-ǵa siltep.
Alaida Mahmetovanyń týystary bul úkimdi ádiletsiz dep sanaidy. Onyń ápkesi Móldirdiń aitýynsha, kompaniianyń quryltaishysy Aigúl Baibektiń (Almatynyń burynǵy ákimi Baýyrjan Baibektiń ápkesi) tapsyrmasymen aqsha Rizagúldiń jeke esepshotyna aýdarylyp otyrǵan. Ol aqshany jetkizýshilerge jáne «Dos-Muqasan» toby men Qanysh Sátbaev týraly filmderge qatysqan akterlerge aýdaryp otyrǵan.
«Eger Rizagúl júzdegen milliondy urlaǵan bolsa, onda Aray Media Group keńsesiniń aldynda gonoraryn almaǵan adamdar kezekte turar edi. Biraq barlyǵy óz aqshasyn aldy, memlekettik satyp alý boiynsha esep te tapsyrylǵan. Chekter, shot-faktýralar, aktiler bar», – deidi Mahmetovanyń ápkesi.
Onyń aitýynsha, Aigúl Baibek aýditorlarǵa tek Mahmetovaǵa aýdarylǵan aqsha týraly bank úzindilerin ǵana bergen. Al gonorarǵa jumsalǵan chekter men aktilerdi kórsetpegen.
«Osy negizde aýditor birjaqty qorytyndy jasaidy. Keiin ápkem elektrondy chekter men aktilerdi ózi jinap, táýelsiz sarapshyǵa ótkizdi. Saraptama hishenie bolmaǵanyn kórsetti. Biraq sýdia bul dálelderdi iske qosýdan bas tartty. Óitkeni sarapshy memlekettik emes dep aitty. Degenmen sarapshyǵa qylmystyq jaýapkershilik jóninde eskertilgen bolatyn», – dedi ol.
Móldir Mahmetovanyń aitýynsha, ápkesine qysym onyń jalaqysyn kóterýdi suraǵannan keiin bastalǵan.
«Aigúl Baibek ne úshin ápkemdi kináli etýge tyrysady? Salyq tekserisi bolǵan jaǵdaida Rizagúldi kináli qylyp shyǵaryp, ózi jaýapkershilikten qutylý úshin», – dedi ol.
Mahmetovanyń otbasy úkimdi qaita qaraýdy talap etip, apelliatsiialyq shaǵym túsirgen.
