Atyraý oblysynda «Batys Petroleum» kompaniiasyna qatysty monopoliialyq zańnamany buzdy degen kúdikpen tergeý bastaldy. Bul týraly Básekelestikti qorǵaý jáne damytý agenttigi málim etti, dep habarlaidy Dalanews.kz Orda.kz-ke siltep.
Agenttiktiń Atyraý oblysy boiynsha departamenti «Batys Petroleum» JShS-ne qatysty tergeýdi jergilikti kásipkerdiń shaǵymy negizinde bastaǵan. Shaǵymdanýshy kompaniianyń vagon-tsisternalardy jóndeý qyzmetterine monopoliialyq joǵary baǵa belgilegenin aitqan. Bul vagondar munai ónimderin tasymaldaý úshin paidalanylady.
«Eger monopoliiaǵa qarsy zańnamanyń buzylýy rastalsa, Batys Petroleum-ǵa jyldyq ainalymynyń 3-5%-y mólsherinde aiyppul salynady, monopoliialyq tabysy tárkilenedi nemese baǵany ekonomikalyq negizdelgen deńgeige deiin tómendetý týraly nusqama beriledi», - delingen agenttik málimdemesinde.
«Batys Petroleum» JShS 2015 jyly mamyr aiynda Atyraý qalasynda tirkelgen. Negizgi qyzmeti - vagon-tsisternalardy jóndeý, tekserý jáne munai ónimderin quiýǵa daiyndaý. Alaida kompaniia quryltaishylarynyń tizimi kópshiliktiń nazaryn aýdaryp otyr.
Kompaniianyń jalǵyz iesi - «Petroleum» JShS. Al «Petroleum»-ǵa úsh zańdy tulǵa ielik etedi:
•PTC Holding - Timýr Qulybaevtyń biznes-qurylymy. Ol bul kompaniiany «Kipros» JShS arqyly baqylaidy.
•«Neoholding» JShS - quryltaishylary qatarynda PTC Holding, Niderlandyda tirkelgen ADNTS Holding B.V. (Qulybaevpen bailanysy bar) jáne biznesmen Daniiar Ábilǵazin bar.
•«Eridan Invest» JShS - kompaniia týraly málimet az, biraq ol da osy tizbektiń bir bóligi.
Bul - agenttiktiń Qulybaevqa qatysty birinshi tergeýi emes. Ótken jyly agenttik Qulybaev baqylaýyndaǵy «Suiytylǵan munai gazy qoimasy» JShS-ne milliard teńgeden astam aiyppul salǵan edi. Sol kezde kompaniia naryqtaǵy úlesin paidalanyp, suiytylǵan gazǵa joǵary baǵa belgilegeni anyqtalǵan.
Qazir «Batys Petroleum» isi boiynsha tergeý jalǵasyp jatyr. Eger kompaniianyń baǵa saiasaty zańǵa qaishy dep tanylsa, bul Atyraý oblysynyń munai servistik naryǵynda aitarlyqtai ózgeristerge alyp kelýi múmkin.
