اتىراۋ وبلىسىندا «Batys Petroleum» كومپانياسىنا قاتىستى مونوپوليالىق زاڭنامانى بۇزدى دەگەن كۇدىكپەن تەرگەۋ باستالدى. بۇل تۋرالى باسەكەلەستىكتى قورعاۋ جانە دامىتۋ اگەنتتىگى ءمالىم ەتتى، دەپ حابارلايدى Dalanews.kz Orda.kz-كە سىلتەپ.
اگەنتتىكتىڭ اتىراۋ وبلىسى بويىنشا دەپارتامەنتى «Batys Petroleum» جشس-نە قاتىستى تەرگەۋدى جەرگىلىكتى كاسىپكەردىڭ شاعىمى نەگىزىندە باستاعان. شاعىمدانۋشى كومپانيانىڭ ۆاگون-سيستەرنالاردى جوندەۋ قىزمەتتەرىنە مونوپوليالىق جوعارى باعا بەلگىلەگەنىن ايتقان. بۇل ۆاگوندار مۇناي ونىمدەرىن تاسىمالداۋ ءۇشىن پايدالانىلادى.
«ەگەر مونوپولياعا قارسى زاڭنامانىڭ بۇزىلۋى راستالسا، Batys Petroleum-عا جىلدىق اينالىمىنىڭ 3-5%-ى مولشەرىندە ايىپپۇل سالىنادى، مونوپوليالىق تابىسى تاركىلەنەدى نەمەسە باعانى ەكونوميكالىق نەگىزدەلگەن دەڭگەيگە دەيىن تومەندەتۋ تۋرالى نۇسقاما بەرىلەدى»، - دەلىنگەن اگەنتتىك مالىمدەمەسىندە.
«Batys Petroleum» ج ش س 2015 جىلى مامىر ايىندا اتىراۋ قالاسىندا تىركەلگەن. نەگىزگى قىزمەتى - ۆاگون-سيستەرنالاردى جوندەۋ، تەكسەرۋ جانە مۇناي ونىمدەرىن قۇيۋعا دايىنداۋ. الايدا كومپانيا قۇرىلتايشىلارىنىڭ ءتىزىمى كوپشىلىكتىڭ نازارىن اۋدارىپ وتىر.
كومپانيانىڭ جالعىز يەسى - «Petroleum» ج ش س. ال «Petroleum»-عا ءۇش زاڭدى تۇلعا يەلىك ەتەدى:
•PTC Holding - تيمۋر قۇلىبايەۆتىڭ بيزنەس-قۇرىلىمى. ول بۇل كومپانيانى «كيپروس» ج ش س ارقىلى باقىلايدى.
•«Neoholding» ج ش س - قۇرىلتايشىلارى قاتارىندا PTC Holding، نيدەرلاندىدا تىركەلگەن ADNTS Holding B.V. (قۇلىبايەۆپەن بايلانىسى بار) جانە بيزنەسمەن دانيار ءابىلعازين بار.
•«ەريدان ينۆەست» ج ش س - كومپانيا تۋرالى مالىمەت از، ءبىراق ول دا وسى تىزبەكتىڭ ءبىر بولىگى.
بۇل - اگەنتتىكتىڭ قۇلىبايەۆقا قاتىستى ءبىرىنشى تەرگەۋى ەمەس. وتكەن جىلى اگەنتتىك قۇلىبايەۆ باقىلاۋىنداعى «سۇيىتىلعان مۇناي گازى قويماسى» جشس-نە ميلليارد تەڭگەدەن استام ايىپپۇل سالعان ەدى. سول كەزدە كومپانيا نارىقتاعى ۇلەسىن پايدالانىپ، سۇيىتىلعان گازعا جوعارى باعا بەلگىلەگەنى انىقتالعان.
ءقازىر «Batys Petroleum» ءىسى بويىنشا تەرگەۋ جالعاسىپ جاتىر. ەگەر كومپانيانىڭ باعا ساياساتى زاڭعا قايشى دەپ تانىلسا، بۇل اتىراۋ وبلىسىنىڭ مۇناي سەرۆيستىك نارىعىندا ايتارلىقتاي وزگەرىستەرگە الىپ كەلۋى مۇمكىن.
