Qurmetti dostar, medısına qyzmetkerleri, dárigerler, medbıkeler, sanıtarlar, medısınalyq uıymdardyń basshylary, sanıtarlyq qyzmettiń mamandary, ýnıversıtetter men ǵylymı ortalyqtardyń qyzmetkerleri, jalpy, qańtar aıynan beri táýlik boıy, demalyssyz jumys istep júrgen áriptester!
Jumystan qatty sharshap, emosıalyq turǵyda álsireı bastaǵandaryńyzdy da bilemin. Aralaryńyzda qanshama adam óz úıine baryp, balalaryn qushaqtaı almaı qınalyp júr.
[perfectpullquote align="full" bordertop="false" cite="" link="" color="" class="" size=""]Keıbirińizde qorqynysh bar, endi birińiz renjısizder. İndetti juqtyrǵandar da az emes.
Biraq, buǵan qaramastan, sizder bas kótermeı eńbek etýdesizder, kúnde emdeýge, adam ómirin saqtap qalýǵa attanasyzdar.[/perfectpullquote]
Dáriger eshqashan da ataq, dańq, aqsha úshin jumys istegen emes, adam ómirin ajaldan arashalap qalý - bizdiń kúndelikti kásibı mindetimiz. Basqa jol joq. MEN SİZDERMEN MAQTANAMYN!
Sizderdi sózben emes, isimen qoldap júrgen otandastarymyzdy maqtan tutamyn. Azamattar qarttarǵa tamaq pen dári-dármek taratýda, qolynan kelgender maska tigýde, júk tıegen ushaqtardyń aqysyn tólep jomarttyq jasap jatqandar bar, ánshilerimiz onlaın konsert berýde, tipti, qarapaıym ǵana úıde karantınde otyryp ta qanshama adam kómektesýde.
Ókinishke qaraı, qazir jasyryn "sarapshylar" men karantınde ábden zerikken dıvan synshylary da kóp. Olar áleýmettik jelilerdegi efırlerdi, jańalyqtardy paıdasy joq bos aqparattarmen toltyryp, baǵa berýde, túsiniksiz boljamdar jasap, aqylǵa qonymsyz usynystar aıtýda.
Sizderden ótinemin, munyń bárin júrekke jaqyn qabyldamańyzdar, kez kelgen jaǵdaıdy shydamdylyqpen, kásibı kózqaraspen qabyldańyzdar.
Qazir qıyn kúnderdi bastan keshýdemiz. Tózimdilik tanytyp, kásibı turǵyda áreket etýimiz qajet. Jumysqa ǵana nazar aýdarǵanymyz abzal. Qazir kóńildiń túbinde jatqan ókpe-renishti qozǵap, daýlasatyn ýaqyt emes. İndetti jeńip, el basyna tóngen synaqty eńsergen soń da, másele sheshýge múmkindik bolady.
Ýaqyt ótedi, epıdemıa ketedi. Bul kezder jaıly kitap jazylar, fılm túsiriler, qıyn kúnderdiń de umyt bolary anyq.
Biraq, aýrýhanalarda jany qınalǵan qanshama adamnyń qasynda kúni-túni dárigerler boldy. Ony ózderińiz bilesizder. Naǵyz batyr – Sizder.
Biz bul vırýsty da jeńemiz, men oǵan senimdimin.
İndetti biz ben sizdiń kásibı biliktiligimiz, ǵylym men tártip jeńedi!
Ózderińizge saq bolyńyzdar!
