قۇرمەتتى دوستار، مەديسينا قىزمەتكەرلەرى، دارىگەرلەر، مەدبيكەلەر، سانيتارلار، مەديسينالىق ۇيىمداردىڭ باسشىلارى، سانيتارلىق قىزمەتتىڭ ماماندارى، ۋنيۆەرسيتەتتەر مەن عىلىمي ورتالىقتاردىڭ قىزمەتكەرلەرى، جالپى، قاڭتار ايىنان بەرى تاۋلىك بويى، دەمالىسسىز جۇمىس ىستەپ جۇرگەن ارىپتەستەر!
جۇمىستان قاتتى شارشاپ، ەموسيالىق تۇرعىدا السىرەي باستاعاندارىڭىزدى دا بىلەمىن. ارالارىڭىزدا قانشاما ادام ءوز ۇيىنە بارىپ، بالالارىن قۇشاقتاي الماي قينالىپ ءجۇر.
[perfectpullquote align="full" bordertop="false" cite="" link="" color="" class="" size=""]كەيبىرىڭىزدە قورقىنىش بار، ەندى ءبىرىڭىز رەنجيسىزدەر. ىندەتتى جۇقتىرعاندار دا از ەمەس.
ءبىراق، بۇعان قاراماستان، سىزدەر باس كوتەرمەي ەڭبەك ەتۋدەسىزدەر، كۇندە ەمدەۋگە، ادام ءومىرىن ساقتاپ قالۋعا اتتاناسىزدار.[/perfectpullquote]
دارىگەر ەشقاشان دا اتاق، داڭق، اقشا ءۇشىن جۇمىس ىستەگەن ەمەس، ادام ءومىرىن اجالدان اراشالاپ قالۋ - ءبىزدىڭ كۇندەلىكتى كاسىبي مىندەتىمىز. باسقا جول جوق. مەن سىزدەرمەن ماقتانامىن!
سىزدەردى سوزبەن ەمەس، ىسىمەن قولداپ جۇرگەن وتانداستارىمىزدى ماقتان تۇتامىن. ازاماتتار قارتتارعا تاماق پەن دارى-دارمەك تاراتۋدا، قولىنان كەلگەندەر ماسكا تىگۋدە، جۇك تيەگەن ۇشاقتاردىڭ اقىسىن تولەپ جومارتتىق جاساپ جاتقاندار بار، انشىلەرىمىز ونلاين كونسەرت بەرۋدە، ءتىپتى، قاراپايىم عانا ۇيدە كارانتيندە وتىرىپ تا قانشاما ادام كومەكتەسۋدە.
وكىنىشكە قاراي، ءقازىر جاسىرىن "ساراپشىلار" مەن كارانتيندە ابدەن زەرىككەن ديۆان سىنشىلارى دا كوپ. ولار الەۋمەتتىك جەلىلەردەگى ەفيرلەردى، جاڭالىقتاردى پايداسى جوق بوس اقپاراتتارمەن تولتىرىپ، باعا بەرۋدە، تۇسىنىكسىز بولجامدار جاساپ، اقىلعا قونىمسىز ۇسىنىستار ايتۋدا.
سىزدەردەن وتىنەمىن، مۇنىڭ ءبارىن جۇرەككە جاقىن قابىلداماڭىزدار، كەز كەلگەن جاعدايدى شىدامدىلىقپەن، كاسىبي كوزقاراسپەن قابىلداڭىزدار.
ءقازىر قيىن كۇندەردى باستان كەشۋدەمىز. توزىمدىلىك تانىتىپ، كاسىبي تۇرعىدا ارەكەت ەتۋىمىز قاجەت. جۇمىسقا عانا نازار اۋدارعانىمىز ابزال. ءقازىر كوڭىلدىڭ تۇبىندە جاتقان وكپە-رەنىشتى قوزعاپ، داۋلاساتىن ۋاقىت ەمەس. ىندەتتى جەڭىپ، ەل باسىنا تونگەن سىناقتى ەڭسەرگەن سوڭ دا، ماسەلە شەشۋگە مۇمكىندىك بولادى.
ۋاقىت وتەدى، ەپيدەميا كەتەدى. بۇل كەزدەر جايلى كىتاپ جازىلار، فيلم تۇسىرىلەر، قيىن كۇندەردىڭ دە ۇمىت بولارى انىق.
ءبىراق، اۋرۋحانالاردا جانى قينالعان قانشاما ادامنىڭ قاسىندا كۇنى-تۇنى دارىگەرلەر بولدى. ونى وزدەرىڭىز بىلەسىزدەر. ناعىز باتىر – سىزدەر.
ءبىز بۇل ۆيرۋستى دا جەڭەمىز، مەن وعان سەنىمدىمىن.
ىندەتتى ءبىز بەن ءسىزدىڭ كاسىبي بىلىكتىلىگىمىز، عىلىم مەن ءتارتىپ جەڭەدى!
وزدەرىڭىزگە ساق بولىڭىزدار!
