Akter bes aidan beri “Qazaqfilm” tizginin ustap keledi. Mansap jolyn teatrdan bastaǵan óner iesi kino salasynda da boi kórsetti. Onyń ishinde Qasym-Jomart Toqaev rólin erekshe atap ótýge bolady. Sodan soń T.Q. Júrgenov atyndaǵy Qazaq ulttyq óner akademiiasyn basqardy.
Satybaldy mán-jaidy bilýge kelgen tilshini birden avtoturaqqa aparyp, jaǵdaidy túsindirdi. Akterdiń aitýynsha, ol zań boiynsha oryndardy jalǵa bere alady. Onyń ústine kópshiliktiń talqysyna túsken kólikter kinostýdiia avtoturaǵynyń aýmaǵynda ornalasqan.
“Meniń endigi mindetim - aman qalý. Biz Krisha.kz saitynda arnaiy orynnyń jalǵa beriletini týraly habarlandyrý tarattyq. Óitkeni birneshe oryndy jalǵa bere alamyz. Maǵan deiin de solai bolyp keldi. Zań boiynsha jalǵa berýge tolyq quqyǵymyz bar. Men kinostýdiiany jalǵa bermeimin. Al avtoturaǵymyz bos tur. Sol sebepti ony jalǵa berip, 10 qyzmetkerimniń ornyn saqtap qalǵym keldi”, - dep túsindirdi direktor.
“Qazaqfilmdi” saqtap qalýǵa qansha qarajat qajet?” degen suraqqa Satybaldy “qanshalyqty kóp bolsa, sonshalyqty jaqsy” dep jaýap berdi. Biraq naqty somasyn aitpady. Sonymen qatar Instagram jelisinde kólikti nege jarnamalaǵany týraly suraq ta qoiyldy.
“Oǵan meniń quqyǵym joq pa? Keibir adamdar osy jaǵdaiǵa bar nazaryn aýdarǵysy keldi. Bul qyzmetke kirispes buryn osy kompaniiamen dostyq qarym-qatynasta boldym. Bul áli kúnge deiin jalǵasyn taýyp keledi. Olarǵa kómektesip turamyn. Eger adam saýatty bolsa, ol odan esh jamandyq kórmeidi” - dep jaýap berdi.
Satybaldy “Qazaqfilm” jaǵdaiyn jaqsartýdy kózdeidi. Alaida onyń aldynda kinostýdiiaǵa basshylyq etken áriptesteriniń isi sátsiz aiaqtalǵan. Sebebi búginde kinostýdiianyń sońǵy basshysy Aqan Sataevtyń («Reketir» jáne «Tomiris» filmderiniń rejisseri) ústinen urlyq boiynsha jáne 400 million teńgeniń jymqyrylýyna bailanysty sotqa deiingi tergeý júrgizilip jatyr.
Kinostýdiianyń qazirgi direktory Orda.kz tilshisine bergen suhbatynda ózinen buryn qyzmet etken áriptesteriniń áreketi men sheshimderin talqylamaitynyn jetkizdi. Qazirgi tańda ol Mádeniet ministrligimen birlesip, “Qazaqfilmniń” bes jylǵa arnalǵan strategiialyq damý josparyn daiyndap jatyr. Qujat qańtar aiynyń sońynda jaryqqa shyǵatynyn aitty. Sondyqtan málimetterdi bólisýden bas tartty.
“Qazaqfilmniń basty problemasy – kinostýdiiaǵa memleket tarapynan tikelei qarjynyń bólinbeýi. Biz filmder túsirýge jáne animatsiiaǵa barlyq qarjyny Ulttyq kinematografiiany qoldaý memlekettik ortalyǵy (2019 jyly qurylǵan Ulttyq kinematografiiany qoldaý memlekettik ortalyǵy – avtordyń eskertpesi) arqyly alamyz. Endi tikelei qarjy alý úshin zańǵa ózgertýler engizgimiz keledi. Óitkeni “Qazaqfilm” ǵylymi-zertteý qyzmetimen ainalysýy kerek. Biz Qazaqstannyń kinoindýstriiasynyń “muzjarǵyshy” bolýymyz qajet. Qoǵamǵa qandai taqyryptyń ózekti bolatynyn jáne kórermender qai janrǵa jii baratynyn baqylaýymyz qajet”, - dep sózin jalǵady Satybaldy.
"Qazaqfilm" sýreti - egemen.kz saitynan alyndy.
Kollaj: Dalanews.kz
https://dalanews.kz/sadak/97570-smayylovta-minez-zhoq-deputat-bapi
