«Kezinde laýazymdy qyzmette júrgen tusta qandaida bir taraptan gúl nemese shampan syiǵa tartylsa biz munyń ózin «orynsyz jaǵyný» dep tanydyq. Kisi qolynan sonyń ózin almadyq. Ondai qurmetteýdi qabyldamadyq.
Al qazir sol gúldiń de shampannyń da kók tiyndyq quny bolmai qaldy.
Qazirgi jemqorlyqtyń qulqyny óte keń. Qoǵamda «túieni túgimen jutatyndar» kóbeiip ketti. Negizinde, bul jaman qasiet qazaqqa tán emes edi. Myna men óz basym biraz kezeńdi basymnan ótkerdim. Keńestik kezeńde bireýdiń bir artyq nársesin kórse ol talqyǵa salynatyn, tekseriletin, jaýapqa tartylatyn. Ol kezde para berý de, alý da urlyqqa sanalatyn.
Qazir ólim men ómirdiń arasynda arpalysyp jatqan adamnan para suraityn halge jettik. Buǵan qatysty bireýler jalaqysynyń azdyǵyn, otbasyn asyraýdyń mashaqatyn aityp aqtalady. Biraq jalaqysy qomaqty, otbasyn asyraýǵa tolyq qabiletti, qolynan is keletin joǵaryda otyrǵandardyń da osy dertke ushyraǵany jasyryn emes.
Saiyp kelgende, báriniń tonaityny – qara halyq. Sol qara halyqtyń paraqorǵa jem bolyp jatqanyn kórgende «qandai zamanǵa tap boldyq» dep baz keshetinim de ras.
«Oramalyn» jasap máseleni sheshýge daǵdylaný – asa qaýipti dert. Eger biz bolashaqta ult bolyp uiysqymyz kelse aldymen osy indetten arylýdy oilastyrǵanymyz jón. Jemqorlyqpen qoǵam bolyp kúresýimiz kerek. Birden para berýge umtylǵansha máseleni basqasha sheshýdiń joldaryn qarastyrǵanymyz abzal.
Tipti keide zańdy bilmegendikten, tildi jetik meńgermegendikten op-ońai bolmashy nárselerdi sheshýge «rahmetin» aityp syi usynatyndar da bar.
Munyń barlyǵy kúni erteń qazaqtyń damý úlgisine keri áser etetin jaittar. Sondyqtan órkenietti elderdiń qatarynan kóringimiz kelse qoǵam paraqorlardan tazarýymyz kerek», - dep jazdy T. Sharmanov.
