1954 jyly Santiagodan ushyp, keiin 35 jyldan soń qaita paida boldy delinetin 513-reis týraly oqiǵa áli kúnge deiin kópshiliktiń qyzyǵýshylyǵyn týdyryp keledi. Bul derek naqty dáleldenbegenimen, aviatsiia tarihyndaǵy eń jumbaq ári qorqynyshty ańyzdardyń biri retinde jii aitylady, dep habarlaidy dalanews.kz.
Oqiǵa 1954 jyldyń 4 qyrkúieginde bolǵan dep baiandalady. Sol kúni bortynda 88 jolaýshy men 4 ekipaj múshesi bar ushaq ádettegi reis retinde saparǵa shyqqan. Jolaýshylardyń arasynda erekshe kúdik týdyratyn adamdar bolmaǵan, al ushaqta qandai da bir qupiia nemese qaýipti júk bolmaǵany aitylady.
Alaida áýe kemesi ushqannan birneshe saǵat ótken soń, Atlant muhitynyń ústinde kenetten radardan joǵalyp ketken. Ushaqtan eshqandai apat dabyly túspegen, ekipaj da bailanysqa shyqpaǵan. Mamandar áýelde lainer muhitqa qulaǵan bolýy múmkin degen boljam jasaǵan. Biraq apat orny da, synyqtary da tabylmaǵan soń, bul jaǵdai tipti jumbaq sipat ala túsken.
Ýaqyt óte kele 513-reis týraly áńgime umytyla bastaǵan. Sol kezdegi gazetter bul oqiǵa týraly jazǵanymen, naqty jaýap tabylmaǵan soń, jurt ta birtindep ony esten shyǵarǵan.
Alaida ańyz boiynsha, 1989 jyly Braziliianyń Portý-Alegri áýejaiynda belgisiz ushaq radarda paida bolǵan. Dispetcherler ekipajben bailanys ornatýǵa tyrysqanymen, eshkim jaýap bermegen. Soǵan qaramastan ushaq áýejaiǵa qonǵan.
Qaýipsizdik qyzmetkerleri áýe kemesine jaqyndaǵanda, onyń syrtynda Santiago Air Lines degen jazýdy kórgen. Bul kompaniia 1956 jyly jabylyp qalǵan dep aitylady. Eń tańǵalarlyǵy, ushaqtyń bort nómiri 513 bolǵan. Iaǵni bul 1954 jyly joǵalyp ketken reispen sáikes kelgen.
Qyzmetkerler bortqa kirgende, odan da qorqynyshty kóriniske tap bolǵany aitylady. Ushaq ishindegi jolaýshylar men ekipaj músheleri qańqaǵa ainalǵan eken. Al ushaqty kimniń jáne qalai qondyrǵany belgisiz kúiinde qalǵan.
Osy oqiǵadan keiin túrli boljam taraǵan. Bireýler ushaq ýaqyt pen keńistiktegi belgisiz qubylysqa tap bolýy múmkin dep túsindirgen. Iaǵni bizdiń álemde 35 jyl ótse de, ushaq úshin basqa ólshemde sanaýly minýt qana ótken bolýy yqtimal degen joramal aitylǵan.
Degenmen bul oqiǵaǵa senbeitinder de kóp. Kóptegen zertteýshiler 513-reis týraly derekti naqty tarihi fakt emes, gazet betinde týǵan ańyz nemese oidan shyǵarylǵan oqiǵa bolýy múmkin dep sanaidy. Óitkeni mundai apat týraly resmi aviatsiialyq derekkózderde naqty málimet joq.
Soǵan qaramastan, "35 jyldan keiin oralǵan ushaq" týraly áńgime jurtty áli kúnge deiin qyzyqtyrady. Biri ony ýaqyt keńistigine qatysty jumbaq qubylys dep qabyldasa, endi biri jai ǵana qalalyq ańyz retinde qaraidy. Qalai bolǵanda da, 513-reis týraly oqiǵa adam qiialyn qozǵaityn eń tylsym aviatsiialyq hikaialardyń biri bolyp qala berdi.
