Májilis depýtaty Nurtai Sabilianov bankter joǵary paiyzben nesie beretinin eskerip, aldaǵy ýaqytta nesie mólsherin jeńildetýdi kózdeitin zań qabyldanatynyn aitty, - dep habarlaidy Dalanews.kz.
Depýtattyń sózinshe, biryńǵai júie bolýy kerek.
"Biz osy máseleni kóterip kele jatyrmyz. Mysaly Qazaqstannyń damý banki bar. Ol iri kásipkerlikti qarjylandyrady. Osy bankti reformalap, osy bankke qarajat jinap, jeńildetilgen nesie berý kerek. Onyń maqsaty - bizneske jyldyq 8-9 paiyzdan aspaityndai nesie berýdi qamtamasyz etý. Sonda ǵana ekonomikany damytamyz, sonda ǵana kásipkerlik alǵa qarai damyp, jalpy halyqtyń jaǵdaiy jaqsarady. Basqa jol joq. Sýbsidiiamen azaitatyn bolsaq ta ol másele sheshilmeidi. Qazir qalai? Eger bankten 22 paiyzben biznes sýbektisi nesie alatyn bolsa, memleket onyń 12 paiyzyn biýdjet esebinen jaýyp berip jatyr", - dedi ol.
Nurtai Sabilianovtyń pikirinshe, bul durys sheshim emes, depýtat buǵan memleket qarajat jumsamaý kerek deidi.
"Ekinshi jaǵyn bilik umytyp jatyr. Bankke bergen aqsha - bankti ári qarai qoldaý degen sóz. Bankter eshqashan da óziniń paiyzyn tómen túsirmeidi", - dedi ol.
Depýtat bank júiesine ózgeris engizý qajet ekenin málimdedi.
"Bizde "Otbasy bank" bar. Turǵyn úimen qamtamasyz etýmen, ipoteka berýmen ainalysady. Kezinde ipoteka da óte qymbat boldy. 20-25 paiyz. Qazir 7-9 paiyzben "Otbasy bank" berip jatyr. Mine osyndai bank quryp, jalpy ekonomikany, azamattardy qarjylandyrýdy qolǵa alýymyz kerek. Óitkeni qazirgi jaǵdai tómen. Bul qolǵa alynbasa, bizde eshnárse sheshilmeidi. Osyny birneshe ret jazyp, kóterip, qazir osy baǵytta jumys júrgizip jatyrmyz.
Ulttyq bank pen agenttik jyldyq syiaqy mólsherin 46 paiyz etip qoiǵan. Bankter bizneske 20-25 paiyzben berip jatyr. Al ári qarai 46 paiyzǵa deiin tutynýshy nesiesi berilip jatyr jáne de bankter ózderi qurǵan keibir qarjy uiymdary arqyly da arzan paiyzben berýi múmkin, biraq ári qarai olar halyqqa tutynýshy nesie retinde qymbat paiyzben beredi. Iaǵni biz bankti qarjylandyrýǵa, banktiń jaǵdaiyn jaqsartýǵa jumys istep jatqan memleketpiz, shynyn aitý kerek. Sondyqtan osyndai bolmaýy úshin jalpy bank júiesine ózgerister kerek", - dep túiindedi Sabilianov.
