Ulttyq quramanyń bas bapkeri Baqtiiar Baiseiitov shákirtteriniń jeńilisin jattyqtyrýshylardyń tapsyrmasyn oryndamaǵanymen túsindirdi, dep habarlaidy Dalanews.kz Olympic.kz portalyna silteme jasap.
"Keshe Meirambek Ainaǵulov jattyqtyrýshylar tapsyrmasyn oryndamady. Biz qatań eskertip, tyiym salǵan ádis-tásildi kilemge shyqqan sátte-aq istep, óz qatesiniń kesirinen qarsylasyna jol berdi. Bizge yńǵaily bolatyndai kúres stilin túsindirip, oǵan jetkizgenimizben, bizdiń tapsyrmamyzdy kilemge shyqqanda oryndaǵan joq”, – deidi bas bapker Baqtiiar Baiseiitov.
Buǵan qosa, ol Demeý Jadyraevtyń jeńilisi týraly pikir bildirdi.
“Búgin Demeý Jadyraev beldesýdi upai sanymen jeńip turǵan bolatyn. Beldesýdiń sońǵy sátinde qarsylasyna ese jiberdi. 30 sekýndtyq úzilis bolǵan kezde bárin túsindirip, beldesýdi sońyna deiin bermei, baqylaýǵa alý keregin aittyq. Demeýdiń dál osylai sońǵy sátte ádiske túsip, qarsylasyna upai syilaǵanyn biz de túsine almadyq. Erteń Nursultan Tursynov beldesedi. Kúrestiń qandai bolatynyn kilem kórsetedi", – deidi bas bapker.
Aita keteiik, grek-rim kúresinen Olimpiada oiyndaryna Qazaqstan úsh joldama jeńip alǵan.
Tokio Olimpiadasyna 60 kelide Meirambek Ainaǵulov, 77 kelide Demeý Jadyraev qatysyp, alǵashqy ainalymda jeńilis tapty. Erteń, 3 tamyz kúni 87 kelige deiingi salmaq dárejesinde Nursultan Tursynov kúresetin bolady.
Buǵan deiin balýan Demeý Jadyraev alǵashqy ainalymda qarsylasyna jol bergenin jazǵanbyz.
Erler arasynda 77 kelige deiingi salmaq dárejesinde synǵa túsken otandasymyz japoniialyq Iakibý Soheige jol berdi. Tartysty beldesý 5:3 esebimen japoniialyq balýannyń enshisine sheshildi.
Japon balýany aqtyq synǵa shyqqan jaǵdaida Demeý Jadyraev jubanysh beldesýinde kúresýge múmkindik alady.
