ۇلتتىق قۇرامانىڭ باس باپكەرى باقتيار بايسەيىتوۆ شاكىرتتەرىنىڭ جەڭىلىسىن جاتتىقتىرۋشىلاردىڭ تاپسىرماسىن ورىنداماعانىمەن ءتۇسىندىردى، دەپ حابارلايدى Dalanews.kz Olympic.kz پورتالىنا سىلتەمە جاساپ.
"كەشە مەيرامبەك ايناعۇلوۆ جاتتىقتىرۋشىلار تاپسىرماسىن ورىندامادى. ءبىز قاتاڭ ەسكەرتىپ، تىيىم سالعان ءادىس-تاسىلدى كىلەمگە شىققان ساتتە-اق ىستەپ، ءوز قاتەسىنىڭ كەسىرىنەن قارسىلاسىنا جول بەردى. بىزگە ىڭعايلى بولاتىنداي كۇرەس ءستيلىن ءتۇسىندىرىپ، وعان جەتكىزگەنىمىزبەن، ءبىزدىڭ تاپسىرمامىزدى كىلەمگە شىققاندا ورىنداعان جوق”، – دەيدى باس باپكەر باقتيار بايسەيىتوۆ.
بۇعان قوسا، ول دەمەۋ جادىرايەۆتىڭ جەڭىلىسى تۋرالى پىكىر ءبىلدىردى.
“بۇگىن دەمەۋ جادىرايەۆ بەلدەسۋدى ۇپاي سانىمەن جەڭىپ تۇرعان بولاتىن. بەلدەسۋدىڭ سوڭعى ساتىندە قارسىلاسىنا ەسە جىبەردى. 30 سەكۋندتىق ءۇزىلىس بولعان كەزدە ءبارىن ءتۇسىندىرىپ، بەلدەسۋدى سوڭىنا دەيىن بەرمەي، باقىلاۋعا الۋ كەرەگىن ايتتىق. دەمەۋدىڭ ءدال وسىلاي سوڭعى ساتتە ادىسكە ءتۇسىپ، قارسىلاسىنا ۇپاي سىيلاعانىن ءبىز دە تۇسىنە المادىق. ەرتەڭ نۇرسۇلتان تۇرسىنوۆ بەلدەسەدى. كۇرەستىڭ قانداي بولاتىنىن كىلەم كورسەتەدى"، – دەيدى باس باپكەر.
ايتا كەتەيىك، گرەك-ريم كۇرەسىنەن وليمپيادا ويىندارىنا قازاقستان ءۇش جولداما جەڭىپ العان.
توكيو وليمپياداسىنا 60 كەلىدە مەيرامبەك ايناعۇلوۆ، 77 كەلىدە دەمەۋ جادىرايەۆ قاتىسىپ، العاشقى اينالىمدا جەڭىلىس تاپتى. ەرتەڭ، 3 تامىز كۇنى 87 كەلىگە دەيىنگى سالماق دارەجەسىندە نۇرسۇلتان تۇرسىنوۆ كۇرەسەتىن بولادى.
بۇعان دەيىن بالۋان دەمەۋ جادىرايەۆ العاشقى اينالىمدا قارسىلاسىنا جول بەرگەنىن جازعانبىز.
ەرلەر اراسىندا 77 كەلىگە دەيىنگى سالماق دارەجەسىندە سىنعا تۇسكەن وتانداسىمىز جاپونيالىق ياكيبۋ سوحەيگە جول بەردى. تارتىستى بەلدەسۋ 5:3 ەسەبىمەن جاپونيالىق بالۋاننىڭ ەنشىسىنە شەشىلدى.
جاپون بالۋانى اقتىق سىنعا شىققان جاعدايدا دەمەۋ جادىرايەۆ جۇبانىش بەلدەسۋىندە كۇرەسۋگە مۇمكىندىك الادى.
