«Qazaqmys» korporasıasynyń Balqash óndiristik alańyndaǵy kásiporyndarda óndiristik úderistiń turaqtylyǵyn arttyryp, qýatyn damytýǵa baǵyttalǵan óndiristik jobalardy iske asyrý jalǵasýda, dep habarlaıdy Dalanews.kz.

Basqarma tóraǵasy Rýslan Óskenáli óńirge jumys sapary barysynda óndiristik nysandardyń qazirgi jaǵdaıymen, atqarylǵan jumys nátıjesimen jáne bolashaqtaǵy damý josparymen tanysty.

Buǵan deıin josparlanǵan sharalar aıasynda birneshe kásiporynda óndiristik jáne gıdrotehnıkalyq nysandardy jańartýǵa baǵyttalǵan ınfraqurylymdyq jumys tolyq aıaqtaldy. Atap aıtqanda, baıytý fabrıkasynyń usaqtaý sehyndaǵy №9 aýystyryp tıeý toraby jóndeldi, sondaı-aq qaldyq saqtaý qoımasynyń bógetin kóterý jumysy júrgizildi. Aldaǵy ýaqytta bógetti ulǵaıtýdyń ekinshi kezeńin iske asyrý josparlanýda.

Óndiristik qýatty damytýmen qatar, kólik jáne tehnologıalyq ınfraqurylymǵa da erekshe kóńil bólinýde. 18 ashyq vagonǵa arnalǵan jylytý júıesi bar jańa ǵımarat salý máselesi qarastyrylýda. Bul jyljymaly quramnyń toqtap turýyn azaıtyp, konsentrattyń úzdiksiz tasymaldanýyn qamtamasyz etedi, sondaı-aq óndiristik qaýipsizdik deńgeıin arttyrady.

Sonymen qatar Vanúkov peshine kómir tozańyn jetkizýdiń jańa júıesin engizý qarastyrylýda. Joba shıkizatty óńdeýdiń tehnologıalyq turaqtylyǵy men qaýipsizdigin arttyrýǵa baǵyttalǵan.

Sapar qorytyndysynda Rýslan Óskenáli Balqash óndiristik alańynyń odan ári damýy úshin óndiristik bazany jetildirý, kásiporyndardyń turaqtylyǵyn saqtaý jáne qaýipsiz eńbek jaǵdaıyn jasaý negizgi baǵyt bolyp qala beretinin atap ótti.