«قازاقمىس» كورپوراسياسىنىڭ بالقاش وندىرىستىك الاڭىنداعى كاسىپورىنداردا وندىرىستىك ۇدەرىستىڭ تۇراقتىلىعىن ارتتىرىپ، قۋاتىن دامىتۋعا باعىتتالعان وندىرىستىك جوبالاردى ىسكە اسىرۋ جالعاسۋدا، دەپ حابارلايدى Dalanews.kz.
باسقارما ءتوراعاسى رۋسلان وسكەنالى وڭىرگە جۇمىس ساپارى بارىسىندا وندىرىستىك نىسانداردىڭ قازىرگى جاعدايىمەن، اتقارىلعان جۇمىس ناتيجەسىمەن جانە بولاشاقتاعى دامۋ جوسپارىمەن تانىستى.
بۇعان دەيىن جوسپارلانعان شارالار اياسىندا بىرنەشە كاسىپورىندا وندىرىستىك جانە گيدروتەحنيكالىق نىسانداردى جاڭارتۋعا باعىتتالعان ينفراقۇرىلىمدىق جۇمىس تولىق اياقتالدى. اتاپ ايتقاندا، بايىتۋ فابريكاسىنىڭ ۇساقتاۋ سەحىنداعى №9 اۋىستىرىپ تيەۋ تورابى جوندەلدى، سونداي-اق قالدىق ساقتاۋ قويماسىنىڭ بوگەتىن كوتەرۋ جۇمىسى جۇرگىزىلدى. الداعى ۋاقىتتا بوگەتتى ۇلعايتۋدىڭ ەكىنشى كەزەڭىن ىسكە اسىرۋ جوسپارلانۋدا.
وندىرىستىك قۋاتتى دامىتۋمەن قاتار، كولىك جانە تەحنولوگيالىق ينفراقۇرىلىمعا دا ەرەكشە كوڭىل بولىنۋدە. 18 اشىق ۆاگونعا ارنالعان جىلىتۋ جۇيەسى بار جاڭا عيمارات سالۋ ماسەلەسى قاراستىرىلۋدا. بۇل جىلجىمالى قۇرامنىڭ توقتاپ تۇرۋىن ازايتىپ، كونسەنتراتتىڭ ۇزدىكسىز تاسىمالدانۋىن قامتاماسىز ەتەدى، سونداي-اق وندىرىستىك قاۋىپسىزدىك دەڭگەيىن ارتتىرادى.
سونىمەن قاتار ۆانيۋكوۆ پەشىنە كومىر توزاڭىن جەتكىزۋدىڭ جاڭا جۇيەسىن ەنگىزۋ قاراستىرىلۋدا. جوبا شيكىزاتتى وڭدەۋدىڭ تەحنولوگيالىق تۇراقتىلىعى مەن قاۋىپسىزدىگىن ارتتىرۋعا باعىتتالعان.
ساپار قورىتىندىسىندا رۋسلان وسكەنالى بالقاش وندىرىستىك الاڭىنىڭ ودان ءارى دامۋى ءۇشىن وندىرىستىك بازانى جەتىلدىرۋ، كاسىپورىنداردىڭ تۇراقتىلىعىن ساقتاۋ جانە ءقاۋىپسىز ەڭبەك جاعدايىن جاساۋ نەگىزگى باعىت بولىپ قالا بەرەتىنىن اتاپ ءوتتى.
