Jetisý oblysynda Balqash kóline deıingi jol qaıta jańǵyrtýdan keıin kólik qozǵalysy úshin ashyldy,- dep habarlaıdy Dalanews.kz

Balqash kóli – Jetisý óńiriniń týrısik áleýetin tanytatyn nysannyń biri. Eske salsaq, Balqash kóline kólikpen barý jaǵdaıyn jaqsartý úshin kólge aparatyn jol eki ýchaskege bólinip, jańǵyrtý jumysy júrgizildi.

Atap aıtqanda, uzyndyǵy 27 km «Lepsi – Balqash kóli» joly ótken jyly paıdalanýǵa berildi. «Almaty – Óskemen – Lepsi – Aqtoǵaı» avtojolynyń 35 - 110 shaqyrymy buǵan deıin josparlanǵanyndaı, jýyrda jol asfálttyń tómengi jabynymen kólik qozǵalysy úshin ashyldy.

- Qazir 40 km jolda asfálttyń betki qabatyn tóseý jumystary qaldy. Odan keıin abattandyrý jumystary atqarylady. Jol boıynda 4 demalys alańy ornatylǵan, onda aıaldama, sanıtarlyq torap qarastyrylǵan. Jol qurylysyn júrgizgen merdiger mekeme jol sapasyna 5 jylǵa deıin kepildik beredi.  Qandaı da bir eskertpeler, aqaýlar shyǵyp jatsa, óz kúshimen retke keltiredi. Qazir jol qurylysyna 65 tehnıka, júzden astam adam tartylǵan. Atalǵan joldy tolyq paıdalanýǵa berý 2026 jylǵa josparlanǵan, - deıdi Jetisý oblysynyń jolaýshylar kóligi jáne avtomobıl joldary basqarmasynyń basshysy Ǵalymjan Dáribaev.

Jol qatynasyna qatysty taǵy bir aıta keterligi, jyl sońyna deıin Lepsi aýylynda zamanaýı jańa temir jol vokzalyn salý mejelengen.