Balnur Jańqabai Koreiadan júldemen oraldy
Ol buǵan deiin «Jasandy intellektiń mass-mediaǵa yqpaly» atty ǵylymi jobasymen aýdandyq, oblystyq jáne respýblikalyq irikteýden irkilmei ótip, halyqaralyq baiqaýdyń joldamasyn qanjyǵasyna bailaǵan. Alaida, bul Balnurdyń alǵashqy jeńisi emes. Dálirek aitsaq, ótken jyly Taraz qalasynda ótken oqýshylar arasyndaǵy Prezidenttik olimpiadaǵa qatysyp, júldeli oralsa, aýdandyq pán olimpiadalarynda árdaiym alǵashqy orynnan kórinip kelgen. Budan bólek, respýblikalyq «Aqbota», halyqaralyq «Zolotoe Rýno» men «Rýsskii medvejonok» syndy baiqaýlardan da júldeli oralyp júr. Al, «Uly dala daryny» atty respýblikalyq ǵylymi joba baiqaýynda «Úzdik ǵylymi joba» nominatsiiasyn ielenýi Balnurdyń eń úlken jetistikteriniń biri eken. Endi mine, álemniń túkpir-túkpirinen jinalǵan 35 memlekettiń arasyndaǵy bási joǵary bilim básekesinde biikten kórinip, óziniń myqtylyǵyn dáleldei bildi. Sonyń arqasynda shýlyq oqýshyǵa Ońtústik Koreiadaǵy kez kelgen meditsinalyq akademiialarǵa 50 paiyzdyq jeńildikpen grant iesi atanýǵa múmkindik týyp otyr. Sondai-aq, óz elimizdegi meditsinalyq akademiialardyń grant iegeri atandy. Bunyń bári Balnurdyń talmai eńbektengen izdenimpazdyǵynyń jemisi bolsa kerek-ti. Al, Balnur Jańqabaidyń aitýynsha, ol atalǵan jobany túgeldei aǵylshyn tilinde jazyp shyqqan kórinedi.
Keleshekte jýrnalist bolýdy qalaityn oqýshy óziniń ǵylymi jobasynyń taqyrybyn da sol salaǵa qatysty etip alǵan. Ol bul jobany óziniń ǵylymi jetekshisi Nina Kobetspen birigip, ótken jyldyń shilde aiynda bastaǵan eken. Sonymen qatar, ǵylymi jobasyn túgeldei aǵylshyn tilinde jazyp, sol tilde qorǵap shyqqan. Aitýynsha, Koreiadaǵy baiqaýǵa sol eldiń beldi ǵalymdary men Garvord ýniversitetiniń mamandary qazylyq etipti.
Aita ketýimiz kerek, byltyr Shý aýdanyndaǵy dál osy Jibek joly mektep-litseiiniń 3 synyp oqýshysy Nurmuhammad Atymtai Malaiziia memleketinde ótken mentaldy arifmetika baǵdarlamasy boiynsha halyqaralyq jarystan ekinshi orynmen oralǵan bolatyn. Osy oraida, daryndy oqýshylardy tárbielep otyrǵan atalmysh mektepke alǵys aita otyryp, oqýshylardyń talaby ushtala bersin demekpiz.
Jambyl oblysy
Shý aýdany
