Bas prokýror Berik Asylov keıingi kezderi Qazaqstanda jıilep ketken sýısıd máselesine qatysty pikir bildirdi, – dep habarlaıdy Dalanews.kz.
"Balalardyń ózine-ózi qol jumsaý tolqyny qoǵamda rezonans týdyrdy. Prokýrorlarǵa ár derek boıynsha tergeýdi erekshe baqylaýdy tapsyrdym. Áleýmettik jeliler balalardyń sýısıd belsendiligine áser etetindikten prokýrorlar 15 myń zıan saıt pen siltemeni buǵattady", – dedi Asylov H áleýmettik jelisindegi paraqshasynda.
Bas prokýror tıisti organdar qıyn turmystyq jaǵdaıdaǵy otbasylarmen jumys istep jatqanyn málimdedi.
"Memlekettik organdarmen sýısıdtiń aldyn alý boıynsha shuǵyl sharalar keshenin ázirleımiz" – dedi ol.
Eske salaıyq, 16 qyrkúıekte Almatyda eki birdeı oqýshy joǵary qabattan sekirip ketken bolatyn. Saldarynan ekeýi de mert boldy. Olardyń biri "eshkimge masyl bolǵym kelmeıdi" dep áldekimge hat jibergen.
Jaǵa ustatarlyq jaıt Jambyl kóshesi men Seıfýllın dańǵylynyń qıylysyndaǵy 9 qabatty baspanada boldy. Úıine qaıtyp kele jatqan almatylyq turǵyn Galına Vasıleva aýlasynyń mańynan polısıa qyzmetkerlerin kórip, jaqyndaı bergende jerden oqýshy qyzdardyń máıitin kórip eseńgirep qalǵan.
– Men emhanada bolǵam. Kelsem, polıseıler júr. Eki qyzdyń denesin kórdim. Olardyń bıikten qulap, ózderine qol jumsaǵanyn estidim. Meniń bilýimshe, olar aldymen, tamyryn kespek bolǵan. Alaıda qoldarynan kelmegen soń, sekirgen sekildi. Sómkeleri tolǵan qorqynyshty zattar, sumdyq-aı! Myna shatyrǵa baratyn baspaldaq únemi ashyq turady, – dedi kýáger Galına Vasıleva.
Turǵyndar qaıǵyly jaǵdaıdan keıin polıseılermen birge júrip, úı kireberisinde temeki qaldyqtaryn baıqaǵan. Odan soń shatyrǵa shyǵyp, oqýshy qyzdardyń sómkeleri men jeke zattaryn kórip shoshyǵan. Sebebi dorbalardyń ishinde qanǵa oranǵan maılyq, dárilik preparattar men qaýipti ótkir zattar bolǵan. Sondaı-aq oqýshynyń biri uıaly telefonynan beıtanys adamǵa kúmándi habarlama jibergen.
