Talas aýdanynda eki balanyń eńbek quldyǵyna jegilýi boiynsha Jambyl oblysynyń ákimi Erbol Qarashókeevtiń tapsyrmasymen arnaiy jumys toby quryldy, dep habarlaidy Dalanews.kz.
"Oblys ákiminiń orynbasary jetekshilik etetin jumys toby máseleni tolyq anyqtaý, balalardyń qaýipsizdigin qamtamasyz etý jáne quqyqtaryn qorǵaý boiynsha zerdeleý jáne tekserý jumystaryn júrgizetin bolady. Zerdeleý nátijesine sáikes qosymsha aqparat joldanady. Qazirgi tańda tiisti quzyrly organdarmen birlesip jasóspirimderdiń qaýipsizdigin qamtamasyz etý boiynsha naqty sharalar qolǵa alyndy", delingen oblys ákimdiginiń habarlamasynda.
Kóterilgen máselege sáikes osy sekildi keleńsiz jaǵdailardyń aldyn alý maqsatynda aldaǵy ýaqytta óńirdegi ózge de bilim mekemeleri jan-jaqty zerdelenetini de naqtylanady.
Aita ketsek, atalǵan másele áleýmettik jelide paida bolǵan videodan keiin qoǵamdyq rezonansqa ie boldy. Videoda balanyń úlkeni ógei ákesiniń qolyna kelgeli eńbek quldyǵynda júrgenin, mal baǵatyndaryn, únemi soqqyǵa jyǵylatyndaryn, toiyp tamaq ishpeitinderin, týǵan ákesine barǵysy keletinin, al anasy ózderine qorǵan bola almaitynyn aitady. Sóz sońynda ol ózderine syrttan kómek bolmasa, bireýi aqyry ólip tynatynyn jetkizedi. Ash-jalańash balanyń denesiniń saý-tamtyǵy joq. Urǵan, soqqannan qalǵan jaralardy da ol videoda kórsetedi.
2025 jyly 9 tamyzda Jambyl oblysy Talas aýdanynda eki kámeletke tolmaǵan balany quldyqta ustaǵan kúdikti ustaldy. Politsiia uryp-soǵý faktisi boiynsha isti tergep jatyr. Al balalar qazir arnaiy saýyqtyrý ortalyǵyna ornalastyryldy. Olarǵa meditsinalyq jáne psihologiialyq kómek kórsetilip jatyr.
