تالاس اۋدانىندا ەكى بالانىڭ ەڭبەك قۇلدىعىنا جەگىلۋى بويىنشا جامبىل وبلىسىنىڭ اكىمى ەربول قاراشوكەيەۆتىڭ تاپسىرماسىمەن ارنايى جۇمىس توبى قۇرىلدى، دەپ حابارلايدى Dalanews.kz.
"وبلىس اكىمىنىڭ ورىنباسارى جەتەكشىلىك ەتەتىن جۇمىس توبى ماسەلەنى تولىق انىقتاۋ، بالالاردىڭ قاۋىپسىزدىگىن قامتاماسىز ەتۋ جانە قۇقىقتارىن قورعاۋ بويىنشا زەردەلەۋ جانە تەكسەرۋ جۇمىستارىن جۇرگىزەتىن بولادى. زەردەلەۋ ناتيجەسىنە سايكەس قوسىمشا اقپارات جولدانادى. قازىرگى تاڭدا ءتيىستى قۇزىرلى ورگاندارمەن بىرلەسىپ جاسوسپىرىمدەردىڭ قاۋىپسىزدىگىن قامتاماسىز ەتۋ بويىنشا ناقتى شارالار قولعا الىندى"، دەلىنگەن وبلىس اكىمدىگىنىڭ حابارلاماسىندا.
كوتەرىلگەن ماسەلەگە سايكەس وسى سەكىلدى كەلەڭسىز جاعدايلاردىڭ الدىن الۋ ماقساتىندا الداعى ۋاقىتتا وڭىردەگى وزگە دە ءبىلىم مەكەمەلەرى جان-جاقتى زەردەلەنەتىنى دە ناقتىلانادى.
ايتا كەتسەك، اتالعان ماسەلە الەۋمەتتىك جەلىدە پايدا بولعان ۆيدەودان كەيىن قوعامدىق رەزونانسقا يە بولدى. ۆيدەودا بالانىڭ ۇلكەنى وگەي اكەسىنىڭ قولىنا كەلگەلى ەڭبەك قۇلدىعىندا جۇرگەنىن، مال باعاتىندارىن، ۇنەمى سوققىعا جىعىلاتىندارىن، تويىپ تاماق ىشپەيتىندەرىن، تۋعان اكەسىنە بارعىسى كەلەتىنىن، ال اناسى وزدەرىنە قورعان بولا المايتىنىن ايتادى. ءسوز سوڭىندا ول وزدەرىنە سىرتتان كومەك بولماسا، بىرەۋى اقىرى ءولىپ تىناتىنىن جەتكىزەدى. اش-جالاڭاش بالانىڭ دەنەسىنىڭ ساۋ-تامتىعى جوق. ۇرعان، سوققاننان قالعان جارالاردى دا ول ۆيدەودا كورسەتەدى.
2025 جىلى 9 تامىزدا جامبىل وبلىسى تالاس اۋدانىندا ەكى كامەلەتكە تولماعان بالانى قۇلدىقتا ۇستاعان كۇدىكتى ۇستالدى. پوليسيا ۇرىپ-سوعۋ فاكتىسى بويىنشا ءىستى تەرگەپ جاتىر. ال بالالار ءقازىر ارنايى ساۋىقتىرۋ ورتالىعىنا ورنالاستىرىلدى. ولارعا مەديسينالىق جانە پسيحولوگيالىق كومەك كورسەتىلىپ جاتىر.
