Elordada 3 jasar balasyn “Astana-1” vokzalyna tastap ketken 25 jastaǵy ana qamaýǵa alynýy múmkin, dep habarlaidy Dalanews.kz.
Buzyq telegram arnasynyń málimetinshe, áiel qamaýǵa alynbaǵan jaǵdaida aiyppul arqalaýy múmkin, ne qoǵamdyq jumystarǵa tartylady.
“Balasyn “Astana” vokzalynda qaldyrǵan 25 jastaǵy ana 45 kúnge qamalýy múmkin (psihikasy saý bolsa, árine). Bul — “Qaýipti jaǵdaida qaldyrý” babynyń birinshi bóliginiń eń qatań jazasy. Qamaýǵa almaǵan jaǵdaida 100 AEK mólsherinde aiyppul tóleidi nemese 120 saǵatqa deiin qoǵamdyq jumystarǵa tartylady”, — deidi Buzyq telegram arnasy.
Arna aqparatynsha, úsh jasar bala Astana qalasy ákimdiginiń qiyn jaǵdaidaǵy balalardy qoldaý ortalyǵyna jiberildi.
“Osy balany ótken aptada anasy Astananyń eski vokzalynda qaldyryp ketti. Keibir derekter boiynsha, qaltasynda "Baladan bas tartamyn" degen qaǵazy bolǵan. Qazir ol "Balalarǵa qoldaý kórsetý ortalyǵynda", — deidi derekkóz.
Eske salaiyq, bala týraly aqparat áleýmettik jelide 5 qańtarda paida boldy. Saǵat 18:00 shamasynda 3 jastaǵy balasyn eski temirjol vokzalyna tastap ketken áiel izdestirilip jatqany habarlanǵan bolatyn.
“Jedel-izdestirý is-sharalarynyń nátijesinde Astana vokzalyndaǵy jelilik politsiia bóliminiń qyzmetkerleri balanyń anasyn izdep tapty. Ol buryn psihiatriialyq dispanserde esepte turǵany belgili boldy. Qazir sábidiń anasy politsiiaǵa jetkizildi. Qazirgi ýaqytta sábidi qaýip-qaterge qaldyrý faktisi boiynsha tergeý júrgizilip jatyr”, - dep habarlady kóliktegi politsiia departamentiniń baspasóz qyzmeti Azattyq rýhy agenttigine bergen túsiniktemesinde.
