Ózgergisi kelmegen adam óspei qalady. Adamdar ózgeristi jek kóredi. Biraq ózgerissiz damý, órkendeý, jetilý múmkin emes.
Djon Meison
Bar adam álemdi ózgertkisi keledi. Alaida eshkim ózin ózgertýge talpynbaidy. Bolýǵa tiisti deńgeige osy turysymyzben jetpesimizdi ańǵarmaimyz.
Marqum astronavt Djeims Irvin bylai degen eken: «Aiǵa qoný aldyn ala daiyndalǵan ǵylymi baǵdarlama boldy dep oilaityn shyǵarsyz? Joq, olai emes. Bizdi tek Aidyń baǵytyna qarai «laqtyryp» jiberdi. Ár on minýt saiyn baǵytymyzdy rettep otyrýǵa májbúr boldyq. Degenmen mejelegen jerden bir jarym metrge aýytqyp baryp qondyq. Al radiýs 800 shaqyrymnan asatyn edi». Ómirdiń ózi de Aiǵa baratyn saiahattai. Túrli nusqa men ózgeristerge toly. Ózgeristen artyq turaqtylyq tappaisyz.
«Eger jeldiń baǵytyn ózgerte almasańyz, jelkenniń kúiin ózgert» degen eken Maks de Pri. Qazirgi bolmysymyzdy ózgertýge erik-kúshimizdi jumsamasaq, bolýǵa tiisti adamǵa ózdigimizden ainala salmaimyz.
«Adam da aǵash sekildi, onyń ósýine kedergi keltiretin artyq-aýysty kertip alyp tastap otyrý otqa jaǵyp tastaǵannan abzal» deidi Djon Trepp. Jaman ádet ózdiginen joiylmaidy. Odan múltiksiz áreketpen qutylý qajet.
Oryndalǵan tilek janǵa maza beredi. Biraq jamandyqtan qutylam dep oilaý aqymaqtyq. Danagói keide óz pikirin ózgertedi. Aqymaq eshqashan ózgertpeidi. Josparyńyzdy ózgertýge sebepshi jaǵdailarǵa daiyn bolyńyz. Kerek kezde sheshimdi ózgerte bilý – danalyqtyń belgisi. Eger adam burys pikirin uzaq ýaqyt boiy aita berse, onda sol pikirdiń durystyǵyna ózi senimdi bola túsedi. Eger siz óz kemshilikterińiz ben qatelikterińizdi aqtap alýǵa tyryssańyz, bul sizdiń olardan bas tartqyńyz kelmeitinin kórsetedi. Qyrsyq adam óz pikirinde qalady. Osy pikir ony bailap ustaidy.
Jańa nárse oilap taba almaǵan kezde tym qurymaǵanda jaqsartýǵa shamamyz keledi ǵoi. «Jańadan tabylǵan» degen keide kónergen dúnieni qaita jańǵyrtý ekenin kórip júrmiz. Adamnyń bári damýǵa beiimdi. Biraq nege ekenin ózgeristi unatpaimyz. Kóp adam ózgeriske aldan jaryq kórgendikten emes, baqai esepten kelisip jatady.
Uly ideialar sátti bolýy úshin olardy da ózgertip, jańartyp, qubylta bilý kerek. Genri Ford óziniń alǵashqy kóliginde keri júris tetigin umytyp ketipti. Onyń qateligin kóp adam bile bermeidi. Al, jetistigi týraly barsha el biledi. Eger jasaǵan isińizdi kúndelikti ózgerissiz qaitalai berseńiz, jetilý men dittegenińe qol jetkizý múmkin emes.
Ózgeris degen bul jaqsylyqtyń basy. Sony umytpaiyq.
Djon Meison
Aýdarǵan Shynar Ábildá
