Aziia damý banki jalpy quny 300 mln dollardan asatyn "Qyzylorda – Jezqazǵan" tas jolynyń qurylysyna aqsha bólýi múmkin. Bul týraly 2024 jyly 8 qarashada Qasym-Jomart Toqaev Ortalyq Aziia óńirlik ekonomikalyq yntymaqtastyǵy baǵdarlamasynyń 23-shi ministrlik konferentsiiasyna qatysý úshin Astanaǵa kelgen Aziia damý bankiniń prezidenti Masatsýgý Asakavamen kezdesýi kezinde aityldy, dep habarlaidy Dalanews.kz.
Aziia damý banki 1994-2024 jyldar aralyǵynda Qazaqstanda jalpy somasy 7 milliard dollarǵa jýyq jobalardy qarjylandyrdy. Atap aitqanda, bank Batys Qytai – Batys Eýropa halyqaralyq kólik dálizin salýǵa, sondai-aq Aqtóbe – Qandyaǵash jolyn qaita jóndeýge qatysqan.
Qazaqstan Prezidenti jańa basym baǵyttar boiynsha birlesken sharalardy odan ári jalǵastyrýdyń mańyzdy ekenin atap ótti. Memleket basshysy Qazaqstanda ekonomikany yryqtandyrý, investitsiialyq ahýaldy jaqsartý jáne elimizdiń ekonomikalyq áleýetin arttyrý úshin qajetti jaǵdai jasaý jumystary jalǵasyp jatqanyn jetkizdi. Qasym-Jomart Toqaev ekonomikany dekarbonizatsiialaý ózara is-qimyldyń perspektivti salalarynyń biri ekenine toqtaldy.
Masatsýgý Asakava Aziia damý banki elimizdiń ekonomikalyq reformalary men ornyqty damý jolyndaǵy tabysyn oń baǵalady
"Sonymen qatar ol banktiń Qazaqstanmen tyǵyz yntymaqtastyqty jalǵastyrýǵa, sonyń ishinde infraqurylymdy jańǵyrtý, áleýmettik salany jetildirý jáne investitsiialyq ahýaldy nyǵaitý baǵytyndaǵy iri jobalarǵa qatysýǵa daiyn ekenin rastady. Aziia damý banki prezidentiniń sapary aiasynda jalpy quny 300 million dollardan asatyn "Qyzylorda – Jezqazǵan" avtojolynyń qurylysyn qarjylandyrý týraly kelisimge qol qoiý josparlanyp otyr", delingen Aqorda baspasóz qyzmetiniń habarlamasynda.
Buǵan deiin biz biyl Eýropalyq qaita qurý jáne damý banki Qazaqstandaǵy 22 jobany júzege asyrýǵa 650 million dollar bóletinin jazǵan bolatynbyz.
