"Astana" kontsert zalynda tuńǵysh ret Qoja Ahmet Iasaýidiń hikmetterine qalam tartqan elge belgili aǵaiyndy kompozitorlar Serikjan jáne Álibi Ábdinurovtardyń "Áziret qonǵan Túrkistan" kontserti ótti.
Kontsertke Astana qalasy memlekettik filarmoniiasynyń akademiialyq simfoniialyq orkestri, kameralyq hory, jeke oryndaýshylar jáne Pavlodar qalasynan arnaiy kelgen vokaldyq kvintet (ánshiler toby) qatysty.
«Hikmetter» simfoniialyq dastany uly babamyzdyń «Diýani hikmet» kitabyn oqý barysynda týǵan tolǵanystarda jáne «Máńgilik» daýys pen simfoniialyq orkestrge arnalǵan shyǵarmada sazger Iasaýi iliminiń rýhani mańyzdylyǵyna, tereńdigine kóńil bólingen.
«Ýa, jaratqan» daýys pen orkestrge arnalǵan romansta Jaratqannyń haq ekendigin, kúnálarynyń keshýin, jaýapty kúnniń keletindigi týraly tolǵansa, «Qoja Ahmet Iasaýi» týyndysy aqyn jáne simfoniialyq orkestrge arnalǵan. Beit-simfoniiada avtor jeke oryndaýshy retinde aqyndy tańdady. Sebebi ol uly babanyń óz beinesi ispettes. Tyńdarmandarǵa uly ustaz, aqyn ózi til qatyp, hikmetterin halqyna ózi oqyp turǵandai áser beredi.
Qazaqstanda alǵashqy ret kásibi mýzyka tilimen hikmetterdi nasihattaityn shyǵarmashylyq kesh - Qoja Ahmet Iasaýidiń sońynda qalǵan telegei-teńiz rýhani murasyn jańǵyrtýdy maqsat tutqan.
- Tórtkúl dúnieniń bas iip, rýhani ortalyǵyna ainalǵan Túrkistannyń qadiri men qasieti barlyq urpaqty oilandyrmai qoimasy anyq. Búgingi kesh kompozitorlyq jolymyzdaǵy eń erekshe, ózindik orny biik shyǵarmashylyqtyń jemisi dep oilaimyn. Biyl "Áziret Sultan" memlekettik tarihi-mádeni qoryq-mýzeiine 40 jyl, Túrkistan qalasy oblys ortalyǵy mártebesin aldy. Osynaý tarihi kezeń tusynda perzenttik úlesimizdi Qoja Ahmet Iasaýi babamyzdyń hikmetterin kásibi mýzyka únimen jetkizdik. Hikmetter jaily jańasha mazmundy dúnieni týdyryp, urpaqqa nasihattaýdyń jańasha qyryn qolǵa alý jóninde eki jyl buryn "Áziret Sultan" qoryq-mýzeiiniń direktory Ahmetjanov Nurbolat dosym oi salyp, rýhani taqyrypty zerttep, mýzyka arqyly sóiletý jaily izdenis jandandy. Nátijesin búgin kórdińizder. Kontsertti aldaǵy ýaqytta elimizdiń barlyq aimaqtarynda, sonymen qatar TÚRKSOI Halyqaralyq uiymynyń qoldaýymen Túrkiia Respýblikasynda ótkizý josparda bar",-deidi Serikjan Ábdinurov.
Keshte Q.A. Iasaýidiń hikmetterine jazylǵan kóptegen shyǵarmalar oryndaldy. Olardyń qatarynda dástúrli ánshilerdiń - «Ei, sopy», «Rasýldyń rizalyǵy», Pavlodar qalasynan kelgen vokaldyq kvintettiń - «Salaýat», «Ash, ei momyn kózińdi» shyǵarmalary, qylqobyzben - «Diýani hikmet», baianmen - «Arystanbab», «Abyz», skripka aspaptarymen - «Kúi-tolǵaý», daýys jáne orkestrmen - «Ýa, jaratqan», «Máńgilik», orkestrmen - «Súiinshi», «Balbal», daýys, fleita jáne hormen - «Iassy», simfoniialyq dastan - «Hikmetter», aqyn jáne simfoniialyq orkestrmen - «Qoja Ahmet Iassaýi» shyǵarmalary bar.
Qazaqstan kompozitorlyq mektebinde rýhani taqyrypqa alǵash ret qalam tartqan aǵaiyndy kompozitorlar Túrkistan oblysy, Otyrar aýdanynyń týmalary.
