"استانا" كونسەرت زالىندا تۇڭعىش رەت قوجا احمەت ءياساۋيدىڭ حيكمەتتەرىنە قالام تارتقان ەلگە بەلگىلى اعايىندى كومپوزيتورلار سەرىكجان جانە ءالىبي ءابدىنۇروۆتاردىڭ "ازىرەت قونعان تۇركىستان" كونسەرتى ءوتتى.
كونسەرتكە استانا قالاسى مەملەكەتتىك فيلارمونياسىنىڭ اكادەميالىق سيمفونيالىق وركەسترى، كامەرالىق حورى، جەكە ورىنداۋشىلار جانە پاۆلودار قالاسىنان ارنايى كەلگەن ۆوكالدىق كۆينتەت (انشىلەر توبى) قاتىستى.
«حيكمەتتەر» سيمفونيالىق داستانى ۇلى بابامىزدىڭ «ديۋاني حيكمەت» كىتابىن وقۋ بارىسىندا تۋعان تولعانىستاردا جانە «ماڭگىلىك» داۋىس پەن سيمفونيالىق وركەسترگە ارنالعان شىعارمادا سازگەر ياساۋي ءىلىمىنىڭ رۋحاني ماڭىزدىلىعىنا، تەرەڭدىگىنە كوڭىل بولىنگەن.
«ۋا، جاراتقان» داۋىس پەن وركەسترگە ارنالعان رومانستا جاراتقاننىڭ حاق ەكەندىگىن، كۇنالارىنىڭ كەشۋىن، جاۋاپتى كۇننىڭ كەلەتىندىگى تۋرالى تولعانسا، «قوجا احمەت ياساۋي» تۋىندىسى اقىن جانە سيمفونيالىق وركەسترگە ارنالعان. بەيت-سيمفونيادا اۆتور جەكە ورىنداۋشى رەتىندە اقىندى تاڭدادى. سەبەبى ول ۇلى بابانىڭ ءوز بەينەسى ىسپەتتەس. تىڭدارماندارعا ۇلى ۇستاز، اقىن ءوزى ءتىل قاتىپ، حيكمەتتەرىن حالقىنا ءوزى وقىپ تۇرعانداي اسەر بەرەدى.
قازاقستاندا العاشقى رەت كاسىبي مۋزىكا تىلىمەن حيكمەتتەردى ناسيحاتتايتىن شىعارماشىلىق كەش - قوجا احمەت ءياساۋيدىڭ سوڭىندا قالعان تەلەگەي-تەڭىز رۋحاني مۇراسىن جاڭعىرتۋدى ماقسات تۇتقان.
- تورتكۇل دۇنيەنىڭ باس ءيىپ، رۋحاني ورتالىعىنا اينالعان تۇركىستاننىڭ ءقادىرى مەن قاسيەتى بارلىق ۇرپاقتى ويلاندىرماي قويماسى انىق. بۇگىنگى كەش كومپوزيتورلىق جولىمىزداعى ەڭ ەرەكشە، وزىندىك ورنى بيىك شىعارماشىلىقتىڭ جەمىسى دەپ ويلايمىن. بيىل "ازىرەت سۇلتان" مەملەكەتتىك تاريحي-مادەني قورىق-مۋزەيىنە 40 جىل، تۇركىستان قالاسى وبلىس ورتالىعى مارتەبەسىن الدى. وسىناۋ تاريحي كەزەڭ تۇسىندا پەرزەنتتىك ۇلەسىمىزدى قوجا احمەت ياساۋي بابامىزدىڭ حيكمەتتەرىن كاسىبي مۋزىكا ۇنىمەن جەتكىزدىك. حيكمەتتەر جايلى جاڭاشا مازمۇندى دۇنيەنى تۋدىرىپ، ۇرپاققا ناسيحاتتاۋدىڭ جاڭاشا قىرىن قولعا الۋ جونىندە ەكى جىل بۇرىن "ازىرەت سۇلتان" قورىق-مۋزەيىنىڭ ديرەكتورى احمەتجانوۆ نۇربولات دوسىم وي سالىپ، رۋحاني تاقىرىپتى زەرتتەپ، مۋزىكا ارقىلى سويلەتۋ جايلى ىزدەنىس جانداندى. ناتيجەسىن بۇگىن كوردىڭىزدەر. كونسەرتتى الداعى ۋاقىتتا ەلىمىزدىڭ بارلىق ايماقتارىندا، سونىمەن قاتار تۇركسوي حالىقارالىق ۇيىمىنىڭ قولداۋىمەن تۇركيا رەسپۋبليكاسىندا وتكىزۋ جوسپاردا بار"،-دەيدى سەرىكجان ءابدىنۇروۆ.
كەشتە ق.ا. ءياساۋيدىڭ حيكمەتتەرىنە جازىلعان كوپتەگەن شىعارمالار ورىندالدى. ولاردىڭ قاتارىندا ءداستۇرلى انشىلەردىڭ - «ەي، سوپى»، «راسۋلدىڭ ريزالىعى»، پاۆلودار قالاسىنان كەلگەن ۆوكالدىق كۆينتەتتىڭ - «سالاۋات»، «اش، ەي مومىن كوزىڭدى» شىعارمالارى، قىلقوبىزبەن - «ديۋاني حيكمەت»، بايانمەن - «ارىستانباب»، «ابىز»، سكريپكا اسپاپتارىمەن - «كۇي-تولعاۋ»، داۋىس جانە وركەسترمەن - «ۋا، جاراتقان»، «ماڭگىلىك»، وركەسترمەن - «ءسۇيىنشى»، «بالبال»، داۋىس، فلەيتا جانە حورمەن - «ياسسى»، سيمفونيالىق داستان - «حيكمەتتەر»، اقىن جانە سيمفونيالىق وركەسترمەن - «قوجا احمەت ياسساۋي» شىعارمالارى بار.
قازاقستان كومپوزيتورلىق مەكتەبىندە رۋحاني تاقىرىپقا العاش رەت قالام تارتقان اعايىندى كومپوزيتورلار تۇركىستان وبلىسى، وتىرار اۋدانىنىڭ تۋمالارى.
