Jambyl oblysynda Ádep jónindegi keńestiń otyrysynda jergilikti kásipkerlerdiń birimen telefon arqyly sóilesken Merke aýdany ákiminiń orynbasary Mirjan Súleimenovtiń isi qaraldy, dep habarlaidy Dalanews.kz Jambyl oblysy ákiminiń baspasóz qyzmetine silteme jasap.
Ol jergilikti kásipkermen telefon arqyly sóilesken sózinde aýdan ákimi "kreslosyn" satyp alatynyn aitqan.
Súleimenovtiń ózi bul jai joldastary arasynda aitylǵan qaljyń sózim edi dep aqtaldy.
Ádep jónindegi keńes shendini qyzmetinen tómendetýdi usyndy. Oblys ákimi Asqar Myrzahmetovtiń tapsyrmasy boiynsha sybailas jemqorlyq quqyq buzýshylyqtarynyń aldyn alý sharasy maqsatynda Súleimenov qyzmetinen bosatyldy, dep habarlady ákimdiktegiler.
Súleimenovtiń telefonyn jemqorlyq isin tekserip jatqan qaýipsizdik qyzmeti tyńdaǵan. Olar onyń ákim kreslosy týraly sózin jazyp alǵan. Memlekettik qyzmetker aqshasy ysyrap bolmai ma dep qobaljidy. Onsha bai emes agrarly óńirge osynsha aqshany (50 myń dollar) shashýǵa tura ma dep salady ol. Keiinnen shendiniń óńirdegi belgili bir kásipkermen sóileskeni belgili boldy.
