Qazaqstanda muraǵa qalǵan úige qatysty birneshe jylǵa sozylǵan daýǵa Kassatsiialyq sot núkte qoidy. Iste aǵasyn óltirgeni úshin sottalǵan adamnyń áieli men uly daýly úige quqyq talap etken, dep habarlaidy dalanews.kz.
Derekkóz málimetinshe, barlyǵy 2007 jyly bastalǵan. Ájei ózine tiesili barlyq múlkin ulyna ósiet etip qaldyrǵan. 2010 jyly ájei qaitys bolǵan soń, uly sol úide tura bergen. Alaida ol murany notariýs arqyly óz atyna rásimdep úlgermegen. 2013 jyly er adam da qaitys bolǵan.
Onyń jieni úi aǵasyna zańdy túrde muraǵa qalǵan dep oilap júrgen. Tek 2023 jyldyń jeltoqsanynda úige qatysty basqa sot isi qaralyp jatqanda, muranyń kezinde resmi rásimdelmegenin bilgen.
Osydan keiin áiel úidi muraǵa alý úshin qujat jinaýǵa kirisken. Sot arqyly ájesimen týystyq bailanysyn rastaǵan jáne notariýsqa júgingen. Biraq murany qabyldaý merzimi ótip ketkendikten, notariýs onyń ótinishin qabyldamaǵan.
Áiel sotqa júginip, murany qabyldaý merzimin qalpyna keltirýdi suraǵan. Aýdandyq sot onyń talabyn qanaǵattandyrdy. Apelliatsiialyq sot bul sheshimdi buzǵanymen, keiin Kassatsiialyq sot aýdandyq sottyń alǵashqy sheshimin qaita kúshine engizdi.
Kassatsiialyq sot áieldiń úige qatysty jaǵdaidy tek 2023 jyly bilgenin jáne sodan keiin murany rásimdeý úshin tiisti áreketterdi jasaǵanyn eskergen.
Sondai-aq sot ájeidiń uly murany notariýsta rásimdemese de, anasy qaitys bolǵannan keiin úide turýyn jalǵastyrǵandyqtan, múlikti is júzinde qabyldaǵan dep tanydy.
Bul sheshimge marqum er adamnyń aǵasyn óltirgeni úshin sottalǵan adamnyń áieli men uly qarsy shyqqan. Olar da úige qatysty talap qoiǵan. Alaida Kassatsiialyq sot olardyń bul baspanaǵa óz betinshe murager retinde talap qoiýyna zańdy negiz joq degen qorytyndyǵa keldi.
