Májilis depýtaty, «Aq jol» partiiasynyń burynǵy tóraǵasy Azat Perýashev Quryltai quramyna enbei qalsa da, ony másele dep sanamaitynyn málimdedi, dep habarlaidy dalanews.kz.
Onyń aitýynsha, saiasattaǵy negizgi maqsattarynyń basym bóligin júzege asyryp úlgergen.
«Men tórt ret depýtat boldym. Úkimet aldynda kótergim kelgen kóptegen máselelerdi júzege asyrdym. Saiasatker retinde ózimdi aitarlyqtai deńgeide iske asyrdym dep esepteimin. Eger áriptesterim tájiribem men kózqarasym áli de qajet dep sanasa, ony talqylaýǵa daiynmyn. Biraq Quryltai quramyna enbei qalsam da, eshqandai problema joq», – dedi Perýashev Májilis kýlýarynda.
Depýtat partiiadaǵy jas ári tájiribeli kadrlarǵa múmkindik berý qajet ekenin atap ótti.
«Partiiada menen burynnan kele jatqan, biraq áli kúnge deiin Parlament depýtaty bolmaǵan azamattar kóp», – dedi ol.
Jýrnalisterdiń «Aq jol» partiiasy tóraǵalyǵynan ketý sebepteri týraly suraǵyna jaýap bergen Perýashev bul sheshimge emotsiia emes, aldyn ala josparlanǵan ózgerister áser etkenin aitty.
«Shynymdy aitsam, Daniia Espaevany osy qyzmetke qańtar aiynan bastap daiyndadyq», – dedi májilismen.
